عبيد البريكي … باندي لصالح أبناء الشعب

Partager

,أيا السلام

اليوم اخترت لكم مقتطفات من الحوار إلي عملوا سي عبيد البريكي مع جريدة المغرب بتاريخ 19-11-2011 ...

ولي ما يعرفوش السيد هذا هو الأمين العام المساعد للإتحاد العام التونسي للشغل واللي ملي خرجت دوسيات جراد وترفعت عليه قضية

ولا نهار كامل يسردك علينا ويتهدد عيني عينك بش يسحق كل من يعترض الإتحاد ...

بالطبيعة الخلط بن الإتحاد والقيادات متاعه مقصود بش يستغلو قوة الإتحاد  ويمارسوا ضغط من خلاله  بش يمنعوا بجلدهم مالمحاسبة

في الفيديو هذي الأستاذ عبد الرؤوف العيادي واحد ملي رفعو القضية يفسر ويحكي في تفاصيل الشي إلي صار

: نجيو تو للحوار ... وهاي أجزاء منو

باهي السيد المحترم هذا مازال يعرض علينا في عضلاتو رغم إلي الكلام إلي يقول فيه في تصريحاته كفيل بش يوصلوا للمحكمة في بلاد فيها قانون بالطبيعة

: شد عندكم 

سي جراد قلك ماخو الميترو ب-100 دينار

 أقرب مكان فيه مترو ب 100 دينار يبعد على العاصمة 45 كم

(المصدر : مكتب دراسات الفن لقيس الأراضي)

وقلك مش أنا وحدي وشبيهم لخرين

باهي كيف سي جراد أمورو واضحة لهلدرجة وانتم كيف ما قلت فالحوار عندكم ثقة في القضاء زايد الحس والمشاكل ...

 تو ياخو حقو سي جراد وطاح الكاف على ضله

أما بالنسبة لحكاية مانيش وحدي هذي وشبيهم لخرين ماو

 عملوا كيفي واكثر فهذا منطق خطير برشة ... 

 منطق إلي أنا مانيش وحدي عملت هكا

,مانيش أكثر واحد إستغل المنصب متاعو ,

مانيش أكثر عبد سرق ,مانيش أكثر عبد لحاس ومانيش أكثر عبد هزيت لية بن علي

إلي يشبه برشة للمنطق إلي حكى بيها أمثال برهان بسيس وكمال مرجان ومحمد جغام ...

وغيرهم من رجالات تونس إلي مش مززيتهم الركبة على الثورة

 زيد مالفوق قاعدين يعملوا في برونزاج على ضهرها ...

بالنسبة للتوجيه الجامعي فهو مستعرف إلي هو و غيرو من الإتحاد

 قاعد يتدخل بش يعمل إعادة التوجيه للناس وفوق هذا  فرحان برشة

و يعلي علينا في صوته " يقولها بصوت عالي "

 شقلك شقال عليك التدخل لصالح أبناء الشعب هو الخبز اليومي للإتحاد وقلك ما يفكوا في حق حد

بربي مدامك  تدروش علينا بلوغة "ولاد الشعب" فاش تدخلو زادة لصالحهم ؟

 تخلصوا في فاتورة الماء  والضو ؟ ترجعوا في حق الدواء ؟

ناقص بش يقلنا في الصباح نخدم فالإتحاد لعشية في وزارة التعليم العالي وفي الليل وزارة الشؤون الإجتماعية ... يا سيد راهي  منظمة نقابية ونقطة وإرجع للسطر

وزيد شنوه الشروط إلي على اساسها تدخل للعباد ؟

!!! أنا إلي نعرفو أغلبية أولاد الشعب ماخو توجيه مش عاجبو

 كيفاش تفرزو بيناتهم !؟ وشبيه أغلب ولاد الشعب ما فبالهمش بالحكاية من اصلو ؟

- بالنسبة لحكاية الماكينة هذي إلي يعاود فيها وين يكلموه ...

نحب نذكرو إلي الماكينة نهار إلي بش تحمي الفساد وبش تتحرك ضد مصلحة الشعب وضد المحاسبة ممكن تمشي في الساقين ...

ونهار إلي بش يتحرك الإتحاد بش يحمي الفساد راهي بش تقعدلو وصمة عار و شوف نلقاولوا بلاصة  في مزبلة التاريخ  ولا لا

زاد ختمها بموضوع التوجيه الجامعي متع بنتو ...

أنا نعرف عباد ما خلطتش على شعب كانوا يحلمو بيها جرت 0.01 في السكور وفي  حالات أقل من هكا ...

 وهو يحكي على الطب ب-15.20 مش ب-10 كيما قالو فالفسبوك !!!؟

مستحيل تكون 15.20 إلي جابتها الآنسة سوار تخلطها لوحدة من كليات الطب في سنة 2006 يمكن في 1996 تخلط أما في 2006 بعيد على الرشمة

وهنا زادة منطق وطريقة تفكير حلزونية ساك ... يا سي عبيد إذا كان بنتك ما خلطتش للشعبة إلي تحبها يعني ما عندهاش فيها الحق إلا بالطرق القانونية

(إعادة توجيه و مغير تدخلات يرحم بوك )

 في ما عدا ذلك راك تعمل فالغلط ... 10 ولا 15 يبدل صحيح من ناحية إلي هي تبركالله عليها عندها قدر محترم متع ذكاء و معدل باهي

(وماهيش مشوشة فالقسم، وترجع في دروسها يعطيها الصحة و "الساعة كروز" تعديها فالمعهد  )

أما ما يبدل شي في حكاية ماعندهاش حق تدخل لكليات الطب

المهم، صحيح إلي حكايات كيف هذي  نكتة في بحر الفساد إلي كان متفشي

 ... وصحيح إلي التدخلات كانت الخبز اليومي لبرشة مسؤولين في وقت بن علي

المؤسف هو إلي انسان مسؤول كيف هذا كيف يتشد بعضمتو نتصور إلي أقل ما ينجم يعمل هو  يستعرف بأغلاطو و يعتذر على التجاوزات إلي كان يعمل فيها

!!! أما  انك توصل في التجلطيم والتهديد وفرحان بإنجازاتك العظيمة فهذا لا يطاق

في الختام، الإتحاد العام التونسي للشغل  بقيادات كيف ما هذي عبارة على قنبلة موقتة وبش يجي نهار بش تتكلم في وجوهنا

صحيح تنظيف الإتحاد ما يجيش ب"ديقاج" قدم مقر الإتحاد ومش فالإتحاد برك بل في كل الهياكل والمؤسسات ... ياخي لتو جادة عليكم إلي "ديقاج" خرجت بن علي ؟

نتفق مع لعباد إلي تقول لازم الشرفاء الإتحاد هوما إلي ينظفوه ...

 أما زادة لازم القضاء يخدم خدمتو وماغير حسابات وخوف ...

على خاطر كل يوم نزيد نتأكد إلي التبوريب أصبح الرياضة الشعبية الأولى في تونس ...

أيا سيدي نهاركم طيب