بصراحة أنا لاني مع القصبة لاني مع القبة ولا حتى مع الحكومة ...
"هاني شادد حكم"
ولكن عملا بسياسة التشفي و الشماتة إلي قاعد نرا فيها ليمات
في تويتر و فيسبوك وغيرو من ناس تعتبر نفسها من دعات الحرية و الكرامة
... أنا نطالب وزارة الداخلية بش تعدل بين مواطنيها ...
و تشد جماعة القبة تحفيهم بالضرب ... تمرمدهم ... تمسح بيهم القاع
و تغرقهم في ظلمات الغاز المطهر للعيون ...
نحبكم تقيسو عليهم الجبة ...
نحب ضرب مشرف و يكون فالمستوى المعهود متاع شرطتنا الباسلة ...
نحبكم تهزولنا ريوسنا و كان لزم ساقينا قدام العالم بعد هالثورة المجيدة
... نحب نبرتاجي الفيديوات متاعهم و نضحك مالقلب
... لا لدولة تميز بين أبنائها و تزرع الفرقة بين مواطنيها ...
لا لدولة بدون هيبة ...
عاشت تونس ... عاش الصيد ... عاش القايد ... عاشت هيبة الدولة
عاش الحاكم المغوار و عاش الشعب على بلنكار
