samedi 18 février 2017

تاست تاست ELFAN VAN BOUMA حول !


#عاليمين_ولا_اليسار_يا_حاج ؟

dimanche 19 août 2012

Bibliothèques dans nos écoles : تدوينة خالية من المال السياسي




: تنبيه 


هذه التدوينة خالية من المال السياسي 
 ... 




إي إي  نعرف ... نعرف برشة لعبت عليهم الدوخة وبرشة نشهم لعرق وممكن برشة يتحير عليهم البوخناق كيف يشوفوا الفيديو هذي

... في كلمتين قاسية الطفولة والحياة على ال إ.ت.ت

الطفل بطبيعته حساس ومن السهل انك تقضي على جيل كامل بفيديو كيف هذي
 ... ولا حتى بمشهد من مسلسل مكتوب يمثل فيه بوشناق 

باش تقولولي شنوا لهدف من الدخلة هذي مانيش عارف برشة
 ... ممكن على خاطر إستانست نستعمل نظرية الصدمة في تدويناتي
 (وممكن زادة لملء الفراغ وبرى )

 المهم ما فماش كان الصديد والوعواشة خطر على ولادنا ... نتصور إلي أهم تلقيح للأطفال هو التلقيح ضد الجهل والامية التلقيح بالمعرفة بالثقافة وبالعلم ...

عاد اليوم حبيت نحكيلكم وفي نفسهذا السياق على حملة منظمتها 

Associamed Tunisie 
(Association des étudiants et internes en Medecine de Tunisie) 



الهدف منها هو توفير مكتبات في المدارس المتواجدة في المناطق المحرومة في تونس كجزء من حملة أوسع تهدف إلى إعادة الإعتبار للكتب والمطالعة عند الأطفال
 (أما حتى الكبار يلزمهم لفتة كريمة كل مديدة )

وحبيت اليوم نوجه دعوة لأصدقائي ،لزوار المدونة ولأي إنسان يرى في روحو مواطن صالح ينجم يقدم الإضافة في هالبلاد ... للمشاركة في الحملة هذي 

الحملة تبدى نهار 1 سبتمبر هدفها في مرحلة أولى جمع مساهماتكم من قواميس،كتب ،روايات، موسوعات ومجلات
 (المهم كتب موجهة للأطفال إلي أعمارهم بين 6 إلى 12 سنة)


في المرحلة الموالية (في شهر أكتوبر) فما فرق من المتطوعين بش تتنقل للمدارس وتكمل المهمة على عين المكان 

رابط الحملة على لفسبوك تلقوه هوني بش تخذ أكثر تفاصيل ...


في الختام

إنت كمواطن صلاح تنجم كل مرة بمساهمة بسيطة في حملات من نوع هذا تعاون في بناء مستقبل أفضل ليك ... لولادك ... وللأجيال أقادمة 

إلي يحب يساهم يشمر على يديه ويمشي يساهم ...
 و كيف ما يقولوا إن لم تفعل فاعلم أنّ ذنوبك وتأثير الوعواشة هما اللذان منعاك..

كان عليا أنا كيف ما قلت سابقاً ... 
فديت من التدوين للخير ،للحب والمعاني الجميلة للحياة... وهذي أخر مرة 

 من الان فصاعدا سوف أدون للإنحراف..للرذيلة وللخراب

والسلام


vendredi 1 juin 2012

حكمة اليوم : دوزة حرية




: حكمة اليوم 
 اليوم ينقصولك مالحرية دوزة ... وغدوة يقعدوك على الدبوزة 
 ‪‪‪‪‪‪‪‎#Liberté_de_presse‬‬‬‬‬‬‬ ‎#Ramzi_Bettibi ‫‫‫‫‫‫‫#رجع_الكاميرا‬‬‬‬‬‬‬ ‎#Ammar‬‬‬‬‬‬‬ ‪‪‪‪‪‪‪ ‪‪‪‪‪‪‪‬‬‬‬‬ 

dimanche 18 mars 2012

 الفنّ أف.أم : Les News - نموت نموت ويحيا العلم





:  تنبيه هام

هذه  التدوينة تحتوي على غازات سريعة الإلتهاب ... يمنع منعاً باتاً التدخين أو اللعب بأعواد الكبريت 

"تمكن صاحب هذي المدونة من إجتياز إختبار الكحول بنجاح مع ملاحظة "حسن واصل و تهاني لجنة التحكيم

 لكن تبقى إمكانية تناول مواد مخدرة مثل "القنب الهندي" أو بالأحرى "البانجو" واردة  بطبيعة الحال

لذلك كان شميت ريحة التعدي على حرمة العلم المفدى الرجاء الإتصال وبسرعة بشرطة النجدة على لرقم 197

***
أنزل بلاي وسكر جلغتك !!!

كان عينيك ما دمعتش يرحم والديك سمحنا مالمحل ... أيا بابا حنك الباب

أيا سيدي السلام على ما تبقى من الزوار ... 

بالطبيعة كيف وسائل الإعلام الكل حتى أنا بش نعمل حفل لتحية للعلم على قريب  تقدمهالكم الأخت خولة وسيتم تحديد المكان والزمان في تدوينه لاحقة 

نعرف إلي هالوطنية مش موالمتني برشة ...
شي عادي كيف تعرفوا إلي الشخص إلي ورى المدونة هذي ماخو إنذار فالليسي جرة تحية العلم ... 

لكن مدام التفليم بالوطنية مسموح ...
 ومادام العلم صارلو كيف طرح باجة ومكثر شكون يعلي أكثر 

بالمناسبة هذي نحب نقترح على وزارة السياحة بش تولي تنظم للسياح زيارة لمكان العلم في منوبة كيف ما نهزوهم لمسرح الجم وغيرو ... وأهوكة  نجيبو الأخت خولة والأخ السلفي ونعود نمثلوها اللقطة من جديد منها بزايد فلوس للبلاد ومنها احنا ما ننساوش الفاجعة وتزيدو تغرسو فينا حب العلم

***
نبدأ على بركة الله

من أقوى البرامج السياسية الجمعة هذي هو اللقاء متع نسمة مع الباجي ...
واللي والعلم لله كينو داخل معاهم شريك في راس المال 


بون كالعادة برامج نسمة شي يعمل الكيف ... وماتنجم كان تخرج بالإفادة منهم ...
 خاصةً كيف تسمع إجابة على سؤال وجودي كيف هذا :






عزيزي الباجي، كيف يسألوك "هل أنت مع أو ضد فتح ملفات التعذيب" وتكون الإجابة "أنا مش طالب لحكاية هذي وماهيش لفايدة تونس وماهيش من اولوياتنا" فاعلم يا صديقي إلي إنت واحل للعنكوش أما أنا نلوم على نسمة واللي كيني محضرتكش للسؤال هذا على خاطر إجابتك متع واحد مشدود بعضمتو


خاصةً فيك نتفكرو  المرسوم رقم 106 بتاريخ 22 أكتوبر 2011 (نهار قبل الانتخابات) ... واللي جاء فيه




أنا كنت نتمنى إلي سيادة المجلس التأسيسي "السلطة العليا" في هالبلاد  وقبل ما يلغي هذا التنقيح يكركرك إنت  والمبزع من وذنيكم ويسألكم على الأهداف والمقاصد من وراء إصدار تنقيح كيف هذا !!؟


***

كيف ما تعرفوا الكل شهدت مختلف الجامعات التونسية الإسبوع الماضي انتخابات المجالس العلمية واللي حسب علمي تعدت في أجواء طيبة إجمالاً ...


فما اشكال برك ، بش تتحصل على النتائج النهائية وتفاصيلها أصعب من رصد الهلال في شهر رمضان بالعين المجردة


فمن ناحية الإتحاد العام لطلبة تونس يتحدث عن إنتصار ساحق وينعت فالطرف الأخر "بالصفر ماغير فاصل" ومن ناحية أخرى الإتحاد العام التونسي للطلبة يأكد إنتصاره في عدد كبير من المجالس إلي ترشح فيها 


... وزيدهم برشة إشاعات وسب وعار كالعادة والله لا تقطعلنا عادة ... ولم يكتفي الطرفان بذلك بل أتحفونا بتحاليل سياسية عميقة كيف :


الجامعة التونسية نسبة الأمية صفر %
نسبة النهقة في الإنتخابات الجامعية صفر %
الشارع التونسي نسبة الأمية 37 %
نسبة النهقة في الإنتخابات 37 %


و كيف :


 الإسلاميين أذكى من غيرهم ... لأنّهم فازوا في الشّعب العلميّة أمّا الآخرون فقد فازوا في الآداب و الإنسانيات و الفنون الجميلة 


أما كيف تعمل طلة في "تصنيف أفضل100 جامعة في العالم"  أو  "أفضل 10000 جامعة" وغيرو من التصنيفات إلي صارت قبل تنجم  تفهم مليح علاش عنا تحاليل ذات جودة عالية كيف هذي 


***

انعقد  يوم 13 مارس 2012 المؤتمر الثالث لـحركة التجديد ...
المصدر
 ولي تم فيه انتخاب المجلس المركزي للحركة وتم فيه زادة التوافق على القيادات الرئيسية واللي هوما :


الدكتور أحمد ابراهيم : رئيس للحركة
جنيدي عبد الجواد : مكلف بالتنظيم والهيكلة
بوجمعة الرميلي : منسق عام
سمير بالطيب : ناطق رسمي


مش ملاحظين حاجة غريبة ولا كيفاش !!؟ 


نتفكر فالجلسة الأولى للمجلس التأسيسي وبعد ما تم الإتفاق بش ينتخبوا نايب ونايبه لرئيس المجلس سي حمد براهيم طلب الكلمة بش يعطي فكرة جهنمية لا تخطر على بال كبار رجال السياسة وهي :
"مادمنا انتخبنا فالأول رئيس المجلس إلي هو ذكر يكون من باب العدل والمساواة والإنصاف والمزايدات الرخيصة إنو ننتخبو النايبه متع الرئيس ومبعد ننتخبو  النائب


اما اليوم في حركة التجديد الراعي الأول للمرأة والمتاجر رقم واحد بحقوقها (من أيمات هيئة بن عاشور لليوم )  وبعد 5 أيام من الإحتفال باليوم العالمي للمرأة يختار بش يكرمها على طرقته ويفرح بيها كيف ما يلزم وذلك بإعفائها من أهم المناصب القيادية فالحزب وتمكينها من إثبات وجودها في ميادين أخرى أكثر أهمية


بون لحقيقة أنا ريقي شاح مالبزاق على وجوه المارك إلي ما تحشمش أما إلي يحب يبزق ياخو راحتو الدار دارو 

***

بعيداً عن سياسة ووجايع الراس والثورة وأهدافها إلي اكتشفت  والعلم لله طلع  مفماش أصلاً ڨول بش نحطو في والديه الكورة ونمركيوهم 


تشهد البطولة الوطنية منافسة شديدة بين النادي الرياضي البنزرتي ، مستقبل المرسى والترجي الرياضي التونسي في حين بعد ما خلط النجم الرياضي الساحلي والنادي الإفريقي للڨعر الظاهر إلي إنطلاقاً مالجولة هذي بداو يحفروا ... شي عادي بعدلي سي جنيح لاهي يبعث فالكيران لمظاهرات العاصمة و سي سليم الرياحي ناوي يولي رئيس الزنطير
من ناحية أخرى تشهد الأحوال جوية إستقرار على كامل تراب الجمهورية في ما يبدو إشارة ربانية واضحة لسد الطريق أمام محاولة اليسار العميل المنبت والحثالة الفرنكوفونية التأمر على المصلحة العليا للوطن


***

في الختام وقبل مانوفى نشرة الصابون هذي فريق "الفن أف أم" يقترح عليكم المسابقة التالية :


تونس بلد يقع في شمال أفريقيا ... 


أتمم الفقرة مبرزاً أهم الخصائص الجغرافية للجمهورية التونسية إستناداً إلى ما درست في المرحلة الاولى من التعليم الاساسي


الرجاء عدم إستعمال محرك البحث ڨوڨل ، موسوعة الأطلس ، كتاب الجغرافية للسنة الرابعة فراشات و إياك ثم إياك  محاولة الإتصال
 بمكتب السي رفيق وزير الخارجية التونسي 


والسلام


***
حقا بربي  ما فما حد مالحكومة هنا !!؟ 
المهم كان فما حد هنا ينجم يخرج تو ... بالنسبة للباقي تفكرت بش نحكيلكم على زوز أخبار على هامش ثورة الكرامة
... إلى من يهمه الأمر



المصدر 


***
إشهار :


لحقيقة لضعف مداخيل المدونة فالفترة الأخيرة ... ومبعد الإستشارة مع رئاسة الجمهورية 
بعنا الصباط متع الولد الكبير ، وكملنا بعنا الكلاسط متع الولد الصغير
 شرينا بهيم كعبتين بريك وحارة فريكاسي للولد أيمن الزواغي بش يتعشى...


(شوف هاك الحناك الله احد عليه )
والباقي شريت بيهم سواڨر تكيفت والديهم وأنا نكتبلكم فالتدوينة هذي


والسلام سيدي

dimanche 29 janvier 2012

الأغنية الحدث : " يا باجي يا بلعوط "


بعد الفشل الذريع لأغنية
 "يا  شعبي  إنت الصوت" ....
اليوم ستديو الفن للإنتاج السمعي البصري  يقدم لكم الأغنية الحدث 
" يا باجي يا بلعوط "

هي لغناية الأصلية ماصته برشة وكلماتها ركيكة فوق اللازم ...
 تعبتني بصراحة بش حسنتها ...
 سينون مالقيتش ستديو بش نسجلها دونك هاني حطيتلكم الغناية الأصلية بش تابعوا بيها



نشوف في شعبي إلي كان على حقو يثور
نشوف في احزاب تتعڨرب وتحب تغور
ريت سحاب وشميت ريحة الجاردور 
حسيت الظلمة مع ايتام حزب الدستور 
***

بلادي نوارة ... عطشانة تلاجي
سطرين من بيان الباجي

بالفاس ندهم على الجبالي وصاحب الدوعاجي *
كان هزني الماء يفرت الزريعة
نصنع مالبندير معاشي
***

بات متهني رنا بنينا حيوط يا باجي يا بلعوط 
***

نبيل القروي في بلادو محقور
على بوه لحنين يجري مقهور
وسلفي بالراس يضرب تقول عبد النور *
هالشعب الجاهل ماليه كان البابور
***

كان احزابنا  ما تقدرشي
نجيبو السبسي نعاونوه
نبنيوها حجرة حجرة
وإلي ما ربحش نربحوه

نحطو اليد في اليد
و بالقلب إناشدوه
وكان هزوا العالي
مالقبر نخرجوه

***
والصحافة فن 
إلي تحب نسمعوك
وتاريخ لبلاد 
بالفوتوشوب نزوروه 

هذي  اللغة خشبية
متع احزاب المامو
نعملوا إلي علينا
وإلي يعمل خوك ... نعكلوه 
***

(الباجي) 
يا بلادي نرجعلك ديما 
وأحزاب الزيرو تناديلي
نرجعلك ديما ديما
والكرسي الحامي يناديلي


"Tu as moissonné l’espoir Grand fut le vertige de ta passion,
Puissant sera celui de ta décision,
et l’alarme de ton cœur derrière les dents,

Ya Bajbouj, écoute l’appel au devant"
***

لن تمروا رنا بنينا حيوط يا شعبي يا ملقوط 
***

حاسس روحي مخنوق
جبت صفر فالصندوق 
يزي ما عشنا اللوطة
نحب نطير كالغرنوق 

حزبك فاتو الفوت
بقلة ليها تعلم
الدنيا هاذي غوره 
وانت رد بالك اتسلم

مانيش باش انسلم
بجبوج معنا  قوي
اندافع على حقي وحق الباجي 
نديد الباي

هذا المفيد
انحبك طحان صنديد
البجبوج يطيح وتقوم
ويرجع ليكم من جديد 

أنا وبش 
أنت وبش 
الكلنا أوباش متحدين
J'appelle à l'unité
اليد في اليد يا أوباش العابدين 
واقفين comme des soldats
كيف الخونة والأعداء
ça y est تونس لاهي حرة
وعهد الثورة لازم يتعدى

Demande aux tyrans، c’est pas facile de partir
Il faut agir et foncer
Finir ce qu'on a commencé
Bourghiba, Ben Ali w Elbajy
A consommer sans modération en Tunisie



بات متهني رنا بنينا حيوط يا باجي يا بلعوط 


لن تمروا رنا بنينا حيوط يا شعبي يا ملقوط 



Bonus Track :



Rq :
صاحب الدوعاجي 

 المنصف بن سالم 

عبد النور


 أيمن عبد النور نسر من نسور قرطاج ... شوف الراس يا بو  ڨلب 



فالختام كان فما شكون يحب يسجلها الغناية أهوكة ماغير ما يشاور

 ولا ريتني لا ريتك ... 
أما نقترح عليك تجيب صوفية صدق ، لطيفة العرفاوي
... بوشناق ،  المنصف  عبلة وبقية الشلة بش تجي خدمة ليكس 


dimanche 15 janvier 2012

Barnous Academy Awards 2011 - Part II


في الجزء الثاني بش نواصل  تفريق الجوائز إلي بديناه هنا ...
بصراحه برشة يستحقوا جوايز ...
أما بش نحاول نختصر أكثر ما يمكن

نبداو على بركة الله

: برنوس أكبر متضرر من هروب زعبوع


طارق المكي ... "مناضل أعالي البحار" ملي مشى عليه بن علي وهو
 حالو لتالي لا لقدام
الخبزة صعبت  وفلوس وفات ...
 مافيها باس واحد يكرموا حتى على خسارة الوقت وعلى الفديوات إلي كان يعمل فيهم قبل الثورة

: برنوس الززار إلي يعظم عالمراڨزي




هذي منجمش نعلق عليها بلاش كلام بذيء لذلك احتفظ بالتعليق لروحي

: برنوس المواطن المثالي 



في وقت من الأوقات كان فما شعار يقول "ڨاز،  كرطوش توانسة ما يخافوش" ... أما المواطن هذا معلبالوش أصلاً 


: برنوس أفضل درامة سياسية

 الجائزة تعود للفلم الحدث "الإنتحار السياسي ... فن مش شربان لبن" من إنتاج الحزب الديمقراطي التقدمي
 بطولة الأستاذ أحمد نجيب الشابي
مسلسل طويل برشة دام أكثر من 12 شهر يعلمك كفاش تنجم تطيح شقا العمر في رمشة عين ومن أكثر اللحظات المؤثرة عندكم اللقطة هذي  


: برنوس أفضل سكاتش ثوري




أما لازم يجي نهار ويذكرني التاريخ  ويذكر دوري الحساس أيام الثورة في التنسيق بين لجنة الحي في الضفة الغربية وهوما يعملوا في كعبات واللجنة في الضفة الشرقية إلي يركركو في التاي... ويرجع الحق لماليه 

: برنوس أفضل فلم بوليسي
 الطرهوني "فاميلي" و12 نينجا





الفيلم يحكي قصة بطل الثورة بدون منازع ودوره الفعال والحاسم في عملية المطار ...
"تلك العملية التي لو عرضت على كل من  سلاحف النينجا، "فولترون" و"غرندايزر
لطلبوا العون من "النمر المقنع" و"جَبرْ الأعور" قبل القبول بيها


نقاط الاستفهام لا تحصى ولا تعد اما مش مشكل لازم يجيني نهار ونصدق كيف برشة عباد


الفلم لا يخلو من الرومانسية والتشويق خاصةً عندما يتعرف بطلنا المغوار على مكان طائرة  سيرين بن علي ...
 ليتحول في لحظات إلى قاضي القضاة  ويبت في هذه  القضية الإستعجالية ويصدر حكمه عليها بالبراة
(سيرين ماتعني حتى شي فالموضوع بالنسبة للعباد إلي فاهمة لحكاية  )
 قبل أن يغادر المكان ... وليبقى السؤال مطروح إلى اليوم ...
متى درس أفراد وحدتنا الخاصة القضاء يسلم قرايتهم  !!؟

: برنوس أحسن نبزة في ربوخ ... الباجي والڨرودة


: برنوس أجمل حركة بهلوانية




وفجأة






بالطبيعة حركة بهلوانية غير عادية  ومش ممكن تراها في حتى سرك فالعالم ...
على خاطر مش ممكن تلقى إنسان عندو قزدرية في وجهو مالنوع هذا ومايحشمش لهالدرجة
 ("أو كيما قالو ناس بكري ... السيد هذا "غاسل وجهو بالبول )


: وبرنوس أفضل فيلم خيال علمي



  حمادي جبالي و الخلافة السادسة

تحب وتكره ... من أجمل ما قيل في عالم السياسة ... 
والخطاب هذا في حد ذاته إشارة ربانية 

: برنوس أقوى مهارات فنية وأجمل المراوغات 

سمير ديلو بدون منازع 






 الإنسان الوحيد على هذه البسيطة إلي ينجم يقنعك إلي السيد الي في الفديو هذي  ماهوش سمير ديلو 


: برنوس أجمل إشارة ربانية 






... مجلة المغرب فالمجلس التأسيسي 


!!! من وضع هذه المجلة
 أنا نتصور إلي هو بيدو الشخص إلي كلم بن علي فالتليفون وهو يخطب ...
 وعلاش لا مايكونش بنفس المناسبة هو إلي قص الضو على المنزه في ماتش الترجي وحمام الأنف 

برنوس أفضل فيلم رعب : تونس تنتخب 


: برنوس أفضل فيلم هزلي

 فيلم "عريضة دزي" إنتاج ،سيناريو حوار ، إخراج وبطولة 
الهاشمي الحامدي 
ملخر الحامدي عمل كل شي فالفيلم هذا 
...
يغني 



يطّول في لسانو
...

يلحّس و يضرب فالبندير



في الختام ... برشة حاجات مش مفهومة و مناش بش نفهموها لقيام عيسى
 اما ممكن برشة يكون الوحيد 
إلي فهمها الثورة ومن ايامها لولى هو السيد هذا ... 



جملة تاريخية بش تبقى في أذهان الجميع ...
 وجملة تحمل برشة معاني في عام صعيب 
لكن أهم حاجة بالنسبة ليا هو إلي في نهاية 2011 جاتنا برشة
 رسائل إيجابية تبعث على الأمل كيف الرسالة هذي 

: برنوس أفضل فلم إباحي


وزير خارجية بن علي الأسبق  و رئيس حزب المبادرة  يحييكم
يتمنالكم عام سعيد ،يترحملكم على الشهداء ،يخملكم في عايلاتهم و في جرحى الثورة ملفوق
 ويشد على أيديكم كالعادة وإنها لثورةٌ حتى النصر 

dimanche 8 janvier 2012

Barnous Academy Awards 2011 - Part I







مع إنطلاق الموسم السياسي الجديد واحد ما ينجمش يمر مرور الكرام
 على سنة 2011, سنة استثنائية بجميع المقايس ...


عام فيه برشة "أشيات" إيجابية وفيه زادة الأشيات سلبية بزايد ... 
وبطبيعة 
التقييم يختلف من عبد لعبد لكن  الأكيد إنو  الطريق مزال طويل وحبتلو
 لياقة بدنية صحيحة وأعصاب أصح 


المهم اليوم حبيت نختار "الباست أوف" من صور ،تصريحات،مواقف
 وأحذاث  هذه السنة المباركة


بش نحاول بطبيعة الحال نحترم التسلسل الزمني للأحداث وكيف ما يصير فالمحافل الدولية الكل لازمني نفرق جوايز على الفايزين
... مش بش نفرق أوسكار ولا تانيت ولا بالم ...
 جايزتنا اليوم وفي إطار إحياء التراث وترسيخ الهوية 
(والتقرب من السلطة والطحين المجاني)
بش تكون "برنوس" مصنوع من صوف الرفيع والصافي والله لا يضيع أجر المحسنين 
:))




برنوس أروع ما قيل في نظام المخلوع 










***

: برنوس الرجلة ... صيد الثورة




كيف ما يقولو شطر الرجولية هروب والشطر لاخر اسألوا عليه الدي دجي كوستا


***
: برنوس  أسوأ إخراج





هذي الخدمة المزروبة والمبلفطة وين توصل ...المخرج نسى مهندس الصوت في وسط البانكة ...
هذا باز عملة من عمايل عبد الجبار لبحوري 


***
: برنوس أجمل صورة جماعية


***
برنوس ابلد نكته
 (أفضل مؤثرات خاصة) 


 RACHID AMMAR : L'HOMME QUI A DIT NON 




الراجل يخدم على روحو لأخر لحظة بتفاني وإخلاص ...
 ولعباد تتبلا عليه وتتهم فيه بالباطل !!؟ ربي يهدي ما خلق 


وبهالمناسبة نهديلو غناية عزيزة برشة على قلبي من الفلكلور  التونسي





***
: برنوس خاص  للمازري الحداد لحقيقة مالقيتش وين نكلاسيه







***
برنوس أجمل عملية انتحارية  : حسن بن عثمان





يا حسن خلي نستوعبوا اللحظة يا حسن هههههه   


***
 : برنوس صورة الثورة


***
: برنوس أسوأ سيناريو ... اتولى 


كالعادة الخدمة المزروبة ما تنجمش تعطيك خير من هكا 

***
: برنوس أقوى لجنة حي

الأكيد إلي كل لجنة حي أيام الثورة عندها خصوصيتها و تستحق تحية أما أحلى ملجنة هذي ما راتش عيني


بلجنة حي كيف هذي تنجم تبات وباب الدار محلول ...


***
: برنوس أفضل نهاية سعيدة


 العربي نصرة باعث القناة من الخيانة العظمى يعود إلى  البيت فرحاً مسرور
 وعلى رأي رجال الشرطة هذي تعليمات 
أما إنت تبقى دائما وأبداً القائد و تبقى دائما وأبداً  سيد الكل 

***
: برنوس الاستقامة والوطنية والأخلاق الطيبة





 بالأمارة هو وبن علي يدخلوا على بعضهم عرايا 
...
 لا يقعد لا فالبيران و لا فالقهاوي وما يصوحبش حوات


...