vendredi 12 novembre 2010

الفنّ أف.أم : Les News - Partie I



موجز لأهمّ الأنباء في نهاية هالأسبوع الشيّق 
اليوم بش نعمل دورة في برشا مواضيع ساخنة ... ثقافة أقتصاد رياضة و كالعادة السياسة حاضرة معنا فالخلفية و بين السطور 
و ربي يوصل بسالم و برّا...

***
بش نبدى أول حاجة بالسِّرك ...
 و بالعروض إلي يقدم فيها السرك الإيطالي "بِلّوتشي" في "تونس ... سبقلي و حطيت الصور متاعو في تدوينة سابقة ...شوف هنا

يقول القايل واحد موش ناقص سرك في حياتو ... تبركلا علينا وين تتلفت تلقا الخير ... تحل التلفزة تتفرج فالسرك, تحل الراديو تسمع السرك ... فالفيسبوك تشوف فالسرك وبلوشي مالفوق ...

بصراحة أنا قلت مافيها باس نمشي نبدل الجوّ ونختار سرك على كيفي و أنا نتصورها فرصة باهية خاصة للوالدين بش يهزو ولادهم الصغار يتفرهدُو شوية ... عل قليلة إلي مش منجم يفرحهم بعلوش فالعيد و إلي بالمناسبة سومو قرب لسوم ال
 Vespa
يهزهم يشوفو النمر و غيرو مالحيونات

? السوال إلي يقعد مطروح ... زعما شنوة خير
??? السِّرك التونسي البلوشي ولاّ السِّرك الإيطالي بلّوتشي
!!! الله أعلم


***
مدام حكيت عالعلوش خلي نواصل في نفس السياق ... 
أكتشفت عندي نهارين حدث مهم برشا عالفيسبوك شوف هنا


? توّا هكا يا ربي يحبو يرزيونا في طرح مشوي في عيد رب العالمين
??? وبربي شنوة نقعدو نعملو مع الكباش إلي عنا فالبلاد ... نلعبو معهم الكارته
هوا كان نخو الموضوع مالناحية الأقتصادية لزمنا نقتلوه و خاصة السنا 
تي واحد ياربي مزال مشوي على الحرقة متاع معمل الشراب (حشا الشهر) المدة إلي فاتت نكملو مانسلعوش فالعيد هذا ... 
? مدام مافمّاش مشوي شنعملو بيه الرجرج

? شكون بش يشربها الكمية الهايلة هاذي

??? بش يشربوها هوما
منتصورش وبالأخص إلي لعباد إلي منظمة الحكاية هاذي من وجوهم مايتعملش عليهم بش يسدو العجز في أستهلاك الروج و روزي و غيرو من مشروبات الشجاعة

لكن فمّا راي أخر يقول ما يجيش نقتلو العلوش من منطلق إنو ميجيش نتطاولو على كائن عندو حقوق أكثر منّا
 ???  عمرك ريت علوش سكرولو جلغتو خاطر يبعبع ولاّ فتقوه من بعضو 
لا ... لا هكّا بش ندخلو للغريق أيّا أخطاني من هالموضوع ...

المهم بصراحة أنا حسب رأي علوش السنا على سومو  الحنين يستاهل الرّجم موش القتل...و أنا نشالا ناوي نمثل بيه و نكّل بيه علنية في البطح متاع الحي

***
نختم الجزء الأول مالجولة متاع اليوم بخبر يهم المدونين التوانسة
 { TnB } و هو عودة موقع 
 للعمل بعد أنقطاع مدة أسبوع ... 
شي يفرح و نشالا من حسن إلى أحسن
ونشالا ديما يقدم الإضافة في سماء البلوغسفار التونسي

الله غالب شوية أشهار مجاني في أنتظار ندبر شركات مساندة  للإذاعة و ندبر عقود PUB صحاح متاع
:p

... للحديث بقية

6 commentaires:

  1. ههههههه ملا ضحكة عالرجرج :)))

    RépondreSupprimer
  2. برجوليّه زايد معاك كيف تِبْد تفِنْ يا الفن .."لا لقتل العلّوش هذا العام " الأدمين متاع هاك الجروب ما يكون كان كان هاك الممسوخة الفرانسويّه الّي تحب الحيونات ولاّ جربوع ملحد ولاّ فجيطاريان حقود ولّا مسهول يحب يعمل ديفرسيون باش الشّعب ما يتململش مالحريقة إلّي شاعله في سوام العلّوش ..وحْله ها النّاس وحْله ..بالنسبه المعمل الشراب إلّي تحرق ..توّه فهمت علاش جمعيتي ربحت ;) وزيد هذيكه مدبره ظاهرلي الجماعه ناوين يعملوا كيف شركات المولتيناسيونال وما ياقفوش كمزوّدين فقط وإنّما ينشطو في البروديكسيون زاده ..ويا زبراطة لبلاد أقلعو عن الشّرب فالجموع يموتوا عالرّبح والممكن يبيعولكم شراب مغشوش ألا هل بلّغت ..الفن كل عام وإنت و عايلة وأمّة محمد حييّن بألف خير..

    RépondreSupprimer
  3. @guyguoz :
    صحيح بعد ما حق ربي خرج وليتو تربحو 3-0
    :p
    شكرا عل إطلالة العزيزة الغالية و نشالا كل عام و أنت حيا بألف خير
    ;)

    RépondreSupprimer
  4. issma3 manghir ma difouli 3la kil 3lilich msssiken 5atih.. béhii!!! :P

    RépondreSupprimer
  5. @Fléna: Ok haw bich ndifouli 3alli ba3houli 5ir :D

    RépondreSupprimer