الفنّ أف . أم : Les News - أنا معارض

Partager

: تنبيه هام

يمنع منعاً بات إستعمال الهاتف الجوال ... 

كما ينصح بعدم مشاهدة النشرة على كل من الدساترة، الضفادع وبقية الحيوانات البرية

إذا كان لديك جهاز لتكييف الهواء ، تأكد من أنه يعمل بشكل صحيح.

في حالة شعورك بدوار الرجاء الإتصال بطبيب العائلة في أسرع وقت ممكن ... 

كانك ظلامي رجعي شعل الضو في طاسة مخك يرحم بوك 

وكانك حداثي فاسق أيا تلم وستر علينا روحك

***

وأخيراً  "دليل المعارض بعد الإنتخابات" متوفر فالأسواق ...  اليكم بعض التفاصيل

إلى كل من إستفاق بعد 14 جانفي وماخلطش على قطار المعارضة ويحب يخلط..

.الفرصة متاحة مرة اخرى وبأرخص الأثمان

إذا كان كليت على راسك فالإنتخابات وخيبلك امالك هذا الشعب الجاهل ...

 إذا كان مخك قلك راك تفهملها بالضبط بالضبط وبلاصتك موش في بلاد متخلفة كيف هكا

كان إنت شاهي تحط لعصا فالعجلة وتحب تربح بالغورة ... كانك نغار  وهوايتك تستنى لعباد في دورة ... امشي لليان هذا وعمل دورة ... 

تو ديجا حصلت وهرة متع معارض ... في إنتظار توفى جوجمة الإنتخابات وتتعمل حكومة و نلقاولك حاجة تعارضها 

مذبيك تبدى تتعلم تخدم بالفوتوشوب وتركب الفيديووات بش تبدى حاضر ...هاكم أسلحة كل مناضل نزيه

ماتنساش ... بالطبيعة عندك حرية الاختيار "التيني" مالقايمة هذي

***

 ...في تونس الكرامة والحرية وبعد مسلسل "الشعب يريد"

 ... اليكم الجديد الجديد "النهضة تطمئن" !!!

بعد حلقة النهضة تطمئن الغرب .. النهضة تطمئن الـحداثيين .. النهضة تطمئن حكومة الظل .. النهضة تطمئن عبد السلام جراد ...

شكون قعد !؟

 نهارين اخرين تمسع النهضة تطمئن بن علي،

 النهضة تطمئن  الحوات صاحب الراجحي ...

النهضة تطمئن الفن وتتعهد بعدم التعرض للمدونة والمواقع الإباحية !!!

يا شيخ هكا تو !؟

أيا يرحم والديكم راهو مجلس تأسيسي وحكومة مش المسامح كريم  !؟

 يزي ما طمأنتهم ! ندوروش على الشعب فرد فرد نطمنو فيه !؟

 تي طمانو ولا الله لطمانو  ولا رقدوا ولا تهناو 

أيا وقيت خدمة ... ديجا عملنا معارضة

***

المجلس التأسيسي المدني في رواية اخرى "الإنتصاب العشوائي المدني" 

زيدو أعملولنا حكومة مدنية ... ونزيدوكم شعب مدني ...

ونكريولكم  طبة أرض اعملوا على والديها بلاد مدنية موش خير !!!؟ 

مانيش عرف لعباد هذي شعندها في مخاخها

 أما الأكيد إلي في تونس الثورة مش التجارة الموازية برك لاقية نجاح

 ... حتى السياسة الموازية ماعندك ما تقول فيها ...

هاو مرة نحبو إستفتاء بالتوازي مع الإنتخابات وتو مجلس تأسيسي موازي !!!؟

 يطلعشي سي محسن مرزوق هذا كناتري وأحنا ما فيبالناش !؟؟

ينعن دين الديمقراطية إلي قروهالكم لاه

***

صدى المحاكم الإستباقية : السكينة بدمها

سورس 

جريدة الشروق 05/11/2011

اليوم نحب نعبر على التضامن متاعي مع ضحايا حرية التعبير في تونس الغد ...

 ونطالب وزارة الداخلية  بتوفير الحماية  لبقية شهداء المستقبل و علم الغيب 

نسأل الله ان يتقبلهم شهداء ويدخلهم فسيح جناته

بون هذا شنوا عنا اليوم فالفقرة هذي وفي إنتظار جرائم جديدة 

على طريقة حظك اليوم والأبراج الصينية نتمنالكم نهاية أسبوع شيقة

"قدمت لكم هذه النشرة برعاية "فياغرا ... 

 يا حسرة كيف كنت مكشبر ومادد وجهي كالبومة  ...

 اليوم بالحبة الزرقة نستفعل في شطر الحومة

(رسالة واحد مالأقلية إلى الشابي (عثمان

Partager

اليوم نحب نوجه رسالة البعض أطراف المعارضة أو بالحرى إلي كانوا قبل معارضة وفي ليلة ونهار دبرو بلاصة و ولاو يستخفو ببقية المعارضة و بالشعب التونسي

, الشعب التونسي إلي وراهم إلي هوا مش مستحقلهم بش يثور و بش يدافع على عالكرامة و الحرية متاعو

الجميّعة إلي قامو مخر مالنوم و خلطو دبرو بليصة في قطار الثورة و نصّبو رواحهم قادة و ما ززاهمش ظهرلي بش يبداو يهبطو في ولاد الثورة فالثنية و بش يشدّو طريق المخلوع

المعارضة أو بالأحرى إلي أحنا سميناهم معارضة في عهد السارق و كيما قالو ناس بكري "من شوق الذكر سماو العجل عثمان" يرحمهم و ينعمهم ناس بكري على هالأمثال, يطلعلنا اليوم عاد عثمان مالعثيمينات (أحمد نجيب الشابي)على قناة الجزيرة و قنوات أخرى بش يقول بالحرف الواحد

 "هم بعض الميات من المتظاهرين"

لا يا أخ !!! ماناش أقلية, العباد المعارضة و إلي مش حابّة الحكومة إلي أنت تنتميلها و تدافع عليها ...الألاف إلي خرجت اليوم في صفاقس, في القيروان في تونس و في كامل تراب الجمهورية ماهمش أقلية و النهار إلي بش يوليو فيه أقلية مزال بعيد مدام أنت و الحكومة متاعك مواصلين الطريق هذا

ونمشي معاك لبعيد يا سيد راكم أنتم الأقلية, أنتوما و الناس إلي تساند فيكم ما تعبيوش زوز سيرات نقل جماعي ولا فقونة متاع قطار الظاحية الجنوبية و في أحسن الحالات و كي تلمو معاكم بقايا الحزب الفاسد

 "تعبيو مدارج الزّوار في "ملعب عبد العزيز الشتيوي بالمرسى

ونحب النذكرك إلي حتى برشا مالعباد إلي ماهيش تتظاهر وهذا من حقها, مش على خاطر عندها ثيقة فيكم لا ! العباد إلي ساكت برشا أنواع

كيما يقول المغيربي

فمّا إلي يحب الثورت توفا بش يرجع يعيش كيما قبل راسو وجعو وتعب مالستراس -

فمّا شكون الحرية متاعو ما تسواش حق قهوة فالمنار ولا النصر -

فما شكون ستانس بتطيح السروال مدة 23 سنا -

و هزان الساقين أسهل عندو مالدفاع عالثورة و الكرامة

وفما شكون زدة يحب يعطيكم فرصة خاطر يرى فما شكون فالحكومة يستحق فرصة -

و الناس هاذم الكل مش عندها ثيقة فيكم أما قاعدين يستناو منكم في حاجات إيجابية بش تطمان و إلي بصراحة كل يوم قاعدين تخسرو منهم برشا الناس هاكم ... شي عادي وقتلي حتى الطريقة إلي تحكيو بيها معا الشعب ما جات شي إبدا من سي فريعة إلي يعاير فينا بالخسائر متاع الثورة وإلي ما تعلم يتبسم فالندوة الصحفية إلى ما عمل دروس خصوصية

مرورا بالوزير الأول و إلي وقت الناس تستنا فيه بش يطمنها ولا يبكي و قريب نطلبو منوّ السماح بش يسكت و ممكن برشا يعيطلو رزوقة للمسامح كريم وصولا ليك إلي أخرتها خذيت المشعل على زعبوع و رديتنا أقلية و جمعة أخى نوليو عصابات ملثمة, عالقليلة زعبوع قالها بعد 23 سنا طغيان و ظلم

الحكومة متاعكم يا سي نجيب هيا إلي تدخلت لعباد في حيط بالظبابية متاعها و تي حتى إلي شديتوهم ستخسرتو فينا بش تعديو تصاورهم, تي حتى تصاور نص في تونس 7 ... أي نعم تونس 7 و كيما قال حسن بن عثمان

 "تتفرج فيها ربع ساعة تموت قناة تقتل بالعرق"

!!! يا سي نجيب وينهم المساجين السياسين إلي بش تسيبوهم الكل

 تي حتى ال11000  إل هربو أغلبهم كان مش كلهم من حق عام

و برشا أسألة أخرين مش وقتو بش نفكرك بيهم, و أنا كمواطن تونسي ندعوك أنت و الحومة متاعك بش تعملو برشا خطوات إيجابة  في أتجاه الشعب مش الشعب بش يتحرك و يجي تحت صبابطكم و راهو الشعب هذا كي يتحرك نتصورك تعرف النتائج و كان ذاكرتك قصيرة و نسيت شنوة صار جمعة إلتالي هزّ التليفون

 و كلم المجرم زعبوع في جدة (كيما عمل عرفك الغنوشي) تو يحكيلك هوّا عالحل

أيا السلام على من أتبع الهدى