يزيني ما سكت ... يزي يا أخي
أبسط حقوقي كمواطن مهضومة و أنا ساكت ... فدييييييت
: و اليوم بش نشكي و بش نتظاهر و نعمل أعتصامات ... لأسباب عدة
اليوم جاني تنبيه مالصوناد بفسخ عقد الأشتراك متاعي و رفع العداد خاطرني ما خلصتش الفاتورة و بعثولي تنبيه وكيف كيف ما خلصتش و كيما تعرفو الممارسة هذي كانت موجودة في أيام النظام "البايت" و الظلم هذا معدش مقبول بعد ثورة الكرامة و الياسمين و الخبز و الماء
- ثاني حاجة نحب نحتج على ضروف العمل متاعي إلي معادش عاجتني, يا أخي برشا عليا 8 سوايع خدمة ما نيش قدهم و الشي هذا عيب و حرام و مش مقبول... و أنا اليوم نحب نطالب بتخفيضهم حتى ل 6 سعات
و بربي زيدوني حتى دينار في تيكيات الفطور راهي العجة مرقاز وين نخدم ب4500
و لذلك من غدوة بش نبدا الصباح بوقفة صامتة بالشموع أمام مقر العمل متاعي و مبعد بش ندخل في أعتصام مفتوح حتى تستجيب الحكومة لمطالبي,
و بش نزيد بعض المطالب متاع ولاد الحومة كرفع جميع الظرايب على الدخان و المشروبات الكحولية (البيرّة و خاصة منها الأجنبية و الروج و ما تابعهم من مواد تصلح للكمية كي الزيتون و الجبن و غيرو) و تخصيص أماكن للسهر
و العرْبدة الليلية في وسط الحي
ونحب نذكر الحكومة الانتقالية إلي أحد الشعارات
إلي تم رفعها من قبل ما يهرب زعبوع هو ...2011 و البيرة بلاش"
ولذلك نحذرها من محولت الألتفاف عالثورة و مكاسبها
و أو محاولت سرقة الأنجازات متاعها
نعرف إلي المطالب متاعي ما جات شي لكن الله غالب لازمني نخلط على حويجة معا هالعالم هذا و ناخو نصيبي مالكعكة, كعكة الثورة إلي ظرب منها أحمد نجيب الشابي و سي أونيس و أعوان و أطارات الشركة الوطنية لطرشي و الليمون,و إلي نحب نذكرهم إلي ظربان الكعكة شي محرم في الدين متاعنا و يعاقب عليه القانون ...
... وراهو عيييييييييب
و ربي تستر لا يجي نهار زعبوع يطالبنا بالباي متاعو زدة
