الفنّ أف.أم : Les News - Partie I - حرية سكر جلغتك !؟

Partager

: تنبيه هام

يمنع منعاً بات إستعمال الهاتف الجوال ... 

هذه التدوينة خالية من الكحول  ... 

ينصح بها في علاج حالات الامساك المزمن، الأرق والفشلة

في حالة شعورك بدوار الرجاء الإتصال بطبيب العائلة في أسرع وقت ممكن

...أو الإتصال برقم النجدة 197

تدوينة غير صالحة للشرب ... تباع للراشدين فقط

***

شهرين حبس  للاستاذ نبيل الحجلاوي بسبب مقال ينتقد المؤسّسة العسكريّة

بش نكون واضحين ينجم يكون يستحق شهرين حبس ولا حتى أكثر المشكل مش هنا خاطر هذي من مشمولات القضاء ... أما حسب رأي المتواضع ما فماش علاش يتعدى مواطن ماينتميش للجيش على محكمة عسكرية 

... لا بصراحة عيب في بلاد ثورة الكرامة والحرية الجيش يشكي ويحكم في نفس الوقت

عزيزي الجيش الوطني المفدى أنا نحب نعرف ... معناتها كان نهار نتعارك مع جندي ولا ضابط فالجيش على صحن تسطيره عند ولد الحاج ونلبسهولو شركة

 (معروف راني ماعندي وين يدور الريح)

 نتعدى على محكمة عسكرية ولا كيفاش ؟

ولا كان نهار نعمل تدوينه نحكي على كراهبكم إلي ما تقفش فالستوب و تفك فالأولوية فالطريق أما هي المحكمة إلي بش تحكم عليا ؟؟؟ 

يهديكم و يكون منكم العقل

"لا للمحاكمات العسكرية للمدنيين"

***

بعد أسبوع شيق عديناه مع قضية الساعة ... "الأمهات العازبات وسعاد عبد الرحيم" ... ومبعد ما طاح المستوى إلى أقصى درجات الإنحطاط ... كالعادة سب وعار وجونا أحلى جو

تقدم وتوخر راديو كلمة وتتحفنا على صفحة الفايسبوك بالكاريكاتور هذي

بالطبيعة تحت غطاء حرية التعبير تنجم تقول أكثر من هكا واحد هاو قاعد يسنس في روحو أما بطبيعة الحال زادة تصويره كيف هذي بش تسمع عليها ما تكره تحت زادة غطاء حرية التعبير وكبان السعد ... 

خلينا من هذا الكل ... مش مهم برشة ! الأهم فالموضوع هو الرد أو بالأحرى الردة متع راديو كلمة ولي كان في مستوى الحدث !!! شد عندك

المصدر

ينعن بو هالبوليس السياسي إلي كرهتورنا بوالديه فالعيشة ...

 حتى يسبوكم عباد على الفيسبوك يوليو بوليس سياسي ؟؟؟

ومع احتراماتي لبرشة عباد تخدم في "كلمة" أما يضهرلي فما شكون مش منجم يخدم على روحو بلاش بن علي و رفلاكس البوليس السياسي قعد مكبش فيه كالبرد ونكتفي بهذا القادر لا نولي زادة أنا بوليس سياسي وكوارتي مكشوفة

***

التدخل الأجنبي في ملابسنا الداخلية

المصدر

بالنسبة ليك إذا إنت غيور على المصلحة العليا للوطن ...

إذا إنت ماشي في بالك إلي التدخل في شأن تونس يتوقف على حضور الجلسة الإفتتاحية للمجلس وإلي كيف بش نطردوهم بش نسلكوها 

إذا إنت ماكش عارف إلي ملابسنا الداخلية الكلي منشورة على سطوحات البلدان الصديقة والشقيقة 

بالطبيعة بش  يكون مش عاجبك أما بربي ماغير تنوفيق يا الكلهم ما يحضروش وما يتدخلوش لحوشنا  يا مرحبا بيهم الكل ...

على العموم قطر مش بش تكون أعر من فرنسا ولا أمريكا في التدخل في أمورنا الداخلية

 متنساوش إلي علاقات تونس وقطر كي الزيت فوق الماء خاصةً بعد ما بعث السبسي منذ الأشهر الاولى للثورة وزير الدفاع متاعنا و معاه

وزير التشغيل و تنمية المحلية و الإستثمار  و "كمال الأجسام"  سي رشيد عمار بش يحلولنا مشاكل البطالة

 (وممكن زادة بش يقوللهم لاااااا)

تذكير :

"لا للمحاكمات العسكرية للمدنيين"

نيييهاهاهاع

***

عالمياً الأن ... الناس الكل صبحت تحكي على المدونة المصرية إلي

 هبطت تصاورها على الأنترنات كيف ما ولدتها أمها ...

!!! قلم ... ربنا كما خلقتنا

وأخيراً بدينا نقطف في ثمار الربيع العربي إلي عمل برشة ريحة

 ولم علينا إلي يسوى ولي ما يسواش

: بون مش بش نحط التصور هنا لزوز أسباب 

 نخاف على المدونة من مقص الأخلاق الحميدة -

 لحقيقة التصويرة ماترتقيش لمستوى تطلعاتي الفنية -

وذلك لضعف الإمكانيات الجسمانية للمدونة 

 دونك حفاظاً على الذوق العام مش بش نحطها ولي يحب يشوف يطل لهنا

هنا نحب نعرف وينهم بناتنا ... ويني مدوناتنا لعزاز فاش يستناو ؟؟؟

  نتصورش أنا عريان ونخليكم فضيحة بين الدول ؟

أية يهديكم الحريات مهددة فالبلاد ولازم شكون يمدلنا يد المساعدة

 (بون يد ، فخذ ، كتف كل قدير وقدرو) 

المهم ركزولنا على "الكاليتي" خاطر لحكاية ليه ليه تخلط لوسائل الإعلام الأجنبية

 والڨورة تتفرج يهديكم 

في الختام 

...

نبهت في شعب مش منجم يحقق أهداف الثورة وهو عندو

"جمعية يكور فيها "هاريسون أفول ...

بالنسبة ليا أنا حتى كان تحبوا ترجعوا بن علي توا مش مشكل عنا جمهور ينجم يبعثوا في أي وقت للسعودية 

ونختم بفيديو قديم يعود للعهد البائد ... فيها زوز مناضلين أنا نعزهم معزة خاصة 

وكتب يا صحافة ... فيراجنا إرهابي

"قدمت لكم هذه النشرة برعاية "جاردور... 

عطر الخليفة السادس