دورة وعكلة في الداخلية

Partager

في خطوة إيجابية وإيجابية جدااااا

فتحت اليوم وزارة الداخلية ابوابها لصحفيين توانسة واجانب بش يعملوا دورة وعكلة في مراكز الاعتقال وياخذوا فكرة على الشقق المفروشة إلي يضيفوا فيها

" المواطن " البريء حتى تثبت ادانته

خطوة كيما يقولو تتمشى مع روح ثورة الحرية والكرامة 

و تدل بوضوح على وجود إرادة سياسية واضحة لتحسين المنظومة الامنية في البلاد  ...

وبهذه المناسبة السعيدة نحب من ناحية

(نحيي أعضاء  الحكومة ونشد على أيديهم 

وعلى رأسهم (إيييييه كنت نكتب فيهم لبن علي لحكاية هذي ... وين مشيت يكب سعدك
وعلى رأسهم الوزير المكلف بالإصلاح في وزارة الداخلية سي لزهر العكرمي ِالملقب لزهر 250 على المجهودات الجبارة والعطاء الغزير

إلي ما انفك ( لا ما فتئ خير ) يقدمه لهذا الوطن العزيز ...

من ناحية اخرى نحب اناشد السيد الباجي القائد السبسي للبقاء على رأس الحكومة بعد إنتخابات المجلس التأسيسي

حرصاً على المصلحة العليا للوطن وتكريساً لمبدأ سيادة الشعب ...
!!! إي ومذبيك تقعد لين تجيف وتعمل الريحة أكثر ملي إنت عاملها

سامحوني تخمرت وخرجت على الموضوع ويضهرلي بدات ترجعلي عاداتي النوفمبرية ...

المصدر

نرجعو لموضوعنا أنا اليوم بصراحة نحب ندعو التوانسة الكل بش "تتلحم" وبش ناقفو الكل مع بعضنا ونحطو اليد فاليد مع رجال الأمن ونكتبو صفحة جديدة من علاقة رجل الأمن بالمواطن

نحب كل مواطن يكتب الصفحة متاعو .... وبش تعرفوا قداش أنا صادق في القول ومخلص في العمل هاني بش ننشر الصفحة متاعي هنا ...

بالطبيعة لإضفاء روح المرح والدعابة على الصفحة بش نبداها نشالله اليوم على بركة الله ببعض الأقوال المأثورة

والأمثلة الشعبية إلي قالوهم ناس بكري فالموضوع هذا والكلكم تعرفوا ناس بكري ما خلاو ما قالو ... كيف

إلي ماعندو والي يقول للڨرد يا خالي

قالوا اش تشتهى يا بوليس ... قالوا قفة بنان

لوحلو الكاكي في فمو حتى تقضي قضيتك منو

البنان إلي مشي للوليدات ... الڨرد أولى بيه

ماغير ما ننساو ألعاب مع الڨرد ...يقعدك على سقف الفنتا

تنجم تعاون في الصفحة هذي بأي مثل يجي على بالك كتعليق ... وكان خفت قولو للي بجنبك ... وكان هوا صباب وخفت لاتطلع ... قولو في قلبك ... هذا أضعف الإيمان

أما ما تنساش بش تنشرها ... أنشرها بقدر كرهك لقردة الداخلية ... أنشرها بقدر غزولك على الحكومة الانتقالية

... أنشرها ! اما المهم كان شدوك ما تصبش بيا

والسلام

تدوينة نشرتها على حبل موقع الزوالي : http://www.zaweli.tn

من بطاقات العهد البائد ...

Partager

أيا سيدي السلام ...

اليوم بش نحكيلكم على بطاقة من بطاقات العهد البائد ...

 إي نعم, بل هي بطاقة العهد البائد بإمتياز ...

البطاقة التي لم ترحل برحيل المخلوع

البطاقة إلي عذبت التوانسة وأبكت ملايين السياح من جميع أنحاء العالم ...

البطاقة إلي تسفه جرتها 70% من المسافرين في المطار 

(معهد الفن للإحصاء) ... 

وربرب في قلبه عون شرطة الحدود كلما نسيها أحد الركاب ...

انها البطاقة التي لأحد يعرف جدواها ... وزارة الداخلية ،أعوان المطار، الخطوط التونسية 

وحتى من قام بتصميمها لا يعلم إلى حد الساعة فيما تستعمل هذه البطاقة الأعجوبة

نتصور برشة عرفتوني علاش نحكي ... أهيا الغنجة

بطاقة ركوب أو نزول

! كيما قلتلكم زايد بش تعرف علاش وكيفاش ... خاطر مش بش تلقى إجابة مقنعة ...

 أما أنا اليوم نحب نعرف حاجة أخرى

نحب نعرف وقتاش !؟

!!! وقتاش بش الناس إلي تخدم بالوراق هاذم يفهموا إلي احنا في 2011 ... 

حتى الثورات أصبحت تدار بالحواسيب والشبكات الإجتماعية

وقتاش بش يفهموا إلي في العصر إلي طرشقت فيه التكنولوجيا الرقمية, الإعلامية 

ووسائل الإتصال لا مكان فيه للاوراق إلا في بيوت الراحة ؟؟؟

وقتاش واحد يولي يمشي للمطار ماغير ما يطلع معاه ستيلو للطيارة ولا يقعد نص ساعة يلوج على واحد يتمزى عليه !؟

!!! وقتاش بش يفهموا إلي الورقة هذي قاعدة تتسبب في برشة حالات إنتفاخ في الأمعاء وفي الغدد اللمفاوية وتوصل في بعض الأحيان إلى مناطق حساسة من الجسد

ووقتاش بش يفهموا إلي حتى كان احنا التوانسة ستانسنا بالميزيرية الكلبة راهو التوريست إلي ساعات يتنقل من بلاد لبلاد ماغير مايستحق حتى باسبور

... مايفهمهش لحكايات هذي وحتى كان تفهمهالو ما تعجبوش

!!! هي برشة عباد خليقة تبدى خارجة ومذبيها ما ترجعش تزيدوا تكملوا على والديهم بالمرج هذا بخلاف التفتيف الزايد واللي لعندو لا ساس لا راس كيف التنبري ب-60 دينار

وإلي بالمناسبة أنا نعتبرو "بركاج" منظم في وضح النهار ... وسرقة عيني عينك
!!! يعجبكشي الواحد تقول عليه جواب مسوقر

المهم أخوف ما أخاف إلي ورقة كيما هذي يكون عندها أهمية كبيرة في الحفاظ على 

الأمن الداخلي والخارجي للبلاد ولا نطلعو نقاومو بيهم في الإرهاب أصلاً ...

 وقتها بالحق ياخيبة المسعى

بون خسارة واحد مش مقدم روحو للتأسيسي باقي نحطها لحكاية هذي فالبرنامج متاعي

... والسلام

http://www.zaweli.tn : المصدر

خاطرة ياسر متيقرة : انا مثلهم ...

Partager

انا مثلهم لاشيئ يعجبني ...

انا مثلهم لاشيئ يعجبني ...

 أما كيف نشوف "طحانة الغلبه" يتبولون على ارداة الشعب نقول ...

 البابور يا من أمور خرجني من لميزار

 

...

ماذا يفعل الزوالي عندما يبحر في اعماق النات ؟؟؟

Partager

أيا سيدي مرحبا ...

بش نحكيو اليوم على الزوالي (التونسي) والسلوك متاعو على شبكة الانترنت ...

ماذا يفعل الزوالي عندما يبحر في اعماق النات ؟؟؟

السؤال هذا ينجم يجاوبنا على جزء كبير منو موقع "ألكسا" من خلال الترتيب إلي يصدرو حول المواقع الأكثر زيارة في العالم

بالطبيعة احنا بش نهتمو كان بالزوالي والمواقع إلي يشوف فيهم ... الترتيب فيه 500 موقع تنجموا تشوفوه هنا ... معيار الترتيب المتبع هو عدد الزوار  وبش تعرفوا أكثر تفاصيل شوفو هنا

أيا شد عندك

الخمسة مواقع الأولى مافيهم حتى مفاجأة  بالعكس  هاذم  المواقع إلي التوانسة تعدي عليهم أكثر وقت كيما فيسبوك ولا اليوتيوب

رغم إلي ماهيش عاجبتني حكاية الفيسبوك هو الأول أما مانجمش نقولها لحكاية هذي !!!

تي فيسبوك هو إلي نحى بن علي من كرسيه بعد 23 عام  !!! وإنت تقلي مايجيش ؟؟؟ مهبول إنت !؟

المركز السادس نلقاو موقع "بلوغر" وهذي حاجة هايلة ... تزيد تأكد إلي التدوين في تونس عندو مكانة باهية عند مستعملي الانترنات والي الزوالي مازال مهتم بالبلوغسفير

و بهذه المناسبة السعيدة ... نحب نقدم تحية إجلال وإكبار لفيلق المدونين متاعنا إلي خرجوا الدكتاتور بالمشطة وخلاونا نتنفسو الحرية ... الحق متع ربي كان موش هوما ما نجمش نكتب حكاية كيما هكا اليوم

في المركز التاسع نلقاو  أول موقع تونسي  وهو  موقع تونيسيا سات

المشكل إلي بعد العشرة مواقع الاولى بش يبدا التبلبيز على قاعدة ... وبصراح سلوك الزوالي على الانترنات مايفرحش برشة

أيا بابا هاو جاك الضرب :

المرتبة 12 موقع "موزايك أف أم" والي يجي قدام تويتر و"أم أس أن" يا بو قلب إي يا سيدي قدامهم !!!؟

المرتبة 16 :

موقع "XNXX Galleries"

...  بش تقوللي عمرنا ما سمعنا به بش نقوللكم إي ممكن اما فما شكون السهرية متاعو ما تحلى كان غادي هههههه

ما نجمش نزيد نفسر أكثر من هكا ... 

إلي يحب يدخل خلي يدخل أما على مسؤوليتو ولا ريتني لا ريتك

و إجرلي يا أحمد  يا بن حسانة ... واجا شوف شباب الثورة وين غاطس ...

مسيب عورتو عريانة ينفخلو عليها الريح مالفقر والبطالة والفساد المتفشي فالبلاد 

ولاهي يتفرج في عورات غيرو

بون لحقيقة متع ربي الدخول للمواقع الإباحية موش بش يكون أسواء 

من الإستماع إلى تفاهات بوبكر بن عكاشة الدعوب

ولا التحليل الفنية متع المحنك (عندو لحناك) بن تيشه بل بالعكس

 انا نتصور الزويز هاكم أخطر ...

ضربتهم فالمخ ميتة ,يسببو حالة كآبة فاسيلمون و 30% من حالات الإصابة  بجلطة في تونس صارو بعد الإستماع

"ل"ميدي شو

(معهد الفن للأحصاء )

أما بالنسبة لموقع "التونسية" عاد هنا معاد تفهم شي .... برجولية إلي يقلي شيعمل المواقع هذا في مركز متقدم هكا عندو جايزة

تي شقالت جوليا بطرس "على شو بعدك بتحبو, على شو على شو" !؟

في المركز 21 و 22 كيف كيف و عيني ما تضركم ويشدلنا في صحتكم ،

 البرني خدام  ... يقطع أعصابكم ما تتعبوش  !؟

الحاجة الإجابية هو إلي تلقى موقع مناظرات الإنتداب في القطاع العمومي في المرتبة  24 وهنا باهي واحد يوفق بين مستقبلو العائلي والمهني في نفس الوقت

ونختم مع موقع وكالة تونس إفريقيا للأنباء في المركز 25 ...  أنا نعرفو من خلال بيانات وزارة الداخلية كي يبداو يحكيو على الأطراف إلي متعرفهاش منين طالعة والعصابات الملثمة

... ولا من بيان إنطلاق حملة التجنيد متع وزارة الدفاع ... ديجا بأخبار كيما هكا ينجم يكون الموقع رقم واحد عالمياً وموش خاسرة فيه الموقع رقم 25 في تونس

: خلاصة الجولة هذي

" الزوالي يقوم من النوم ... يحل صفحة "قوقل" و موقع "تونيسيا سات"،

 يحل "فيسبوك" يبرتاجي  تصاور و يحكي شوية مع صحابو ...

في نص النهار سعات يحل "تويتر" 

سينون يبعث الترشح متاعو في مناظرة من مناظرات
مبعد يقرا لاخبار من موقع "التونسية" و"وكالة تونس إفريقيا للأنباء" 

 وهو يسمع في الفن على يوتيوب ...

وفي الليل يسمع مقتطفات من "ميدي شو " 

وهو يشاهد ما لذ وطاب من الصور و الافلام الخليعة و...

"يغسل سويقاتو يسكر صفحة "قوقل" و  صفحة "تونيسيا سات" 

الي حلهم الصباح ويرقد

NB:

في صورة تطابق هذا البرنامج مع البرنامج اليومي متاع واحد فيكم ...

 ما تخافش ماكش وحدك ...  

وإرفع رأسك راك فخر لهذا الوطن وهذا الفن يحيك ويشد على يديك

....  وسلام على شعبنا وإنها لفرجة حتى النصر حتى النصر

نظرية اليوم : الولايات المتحدة ... و الربيع العربي في سطرين

Partager

المصدر

ما شاء الله نبيه جدااااا

الحقيقة متع ربي ماقلقنيش أدمين الصفحة بالعكس جابلي ضحكة
وقعدت نحمد في ربي على نعمة العقل


وما سخفونيش ال-37 ألف متفرج إلي حاضرين في الصفحة

بالعكس قلت ربي يزيدهم هم على هم ...

أما في نفس الوقت تشويت، تشويت وغاضتني روحي قد صبري في الدنيا كي ريت

ال-26 جام  !!! 

26 جام يا ربي !!! اش أكثر مالغبينة هذي !؟؟

أيا برجله خلي نمشي على روحي لا نولي نقول فالكلام الزايد 

السلام

!!! توّه ... أي نعم توّه

Partager

توّه ... أي نعم توّه

العدالة توّه ، الحرية توّه  الكرامة كيف كيف توّه ...

 لا ظلم لا قهر ولا محسوبية توّه ... لا قمع ولا إضطهاد ولا بوليس سياسي توّه ...

 تحب تعيش عيشة فل توّه ؟

 تحب خدمة توّه ؟

 تحب تعرس توّه ؟

وتحب سياره شعبية توّه ؟ 

حتى الدار زادة تحبها  توّه  توّه ؟؟؟

انت ما تحلالك كان اللقمة الباردة  توّه ؟ 

و تموت على الرزق الي ماتو ماليه  توّه توّه ؟؟؟

 ... 

ملا هاو في بالك إلي  النهار راح توّه 

و وقيت بش تفيق على وضعك توّه 

... و تنقص مالريق البارد توّه توّه...

 كانك تلميذ ولا طالب، وقيت بش تقرا على روحك توّه 

 ...

و كان عندك خدمة، وقيت بش تخدم خدمتك على قاعدة توّه

  ... 

الكلنا يد وحدة ونعاونو بلادنا توّه 

و في الإنتخابات الجاية نقولو للاتحاد الوطني الحرّ

مرَّ من هنا … يوم 14 جانفي

Partager

أيا مرحبا …

يا سيدي بن سيدي بعد المراوغة « واحد ثنين » إلي عملها الحزب الديمقراطي التقدمي مع مناضلين الحزب متاعو في فرع بنزرت … ولي تنجموا تلقاو تفاصيلها هنا وهنا

بدا الحزب حملة متع تطهير ونظافة كبيرة ومنها على الفيسبوك

 … عندكم مثلاً  ڨروب  …

Mehdi Ben Gharbia tête de liste PDP-BizerteDémarrer

دخلت خوكم  كالعادة نسرح في سويقاتي قلت نعمل طلة  … عاد وأنا فالڨروب  نتطلفح  من بوليكاسيون لبوليكاسيون هكاك و نطيحلكم بالتصورة هذي

PDP,Mehdi Ben Gharbia

المصدر

في لحظة ضرب في مخي طول الباعث و قناتو المبعوثة 

 … " إلي لم ينتظر 14 جانفي"
لكن مش مهم …الجرب يعدي هذا شي عادي و معروف …

لذلك ممكن برشة فرع pdp بنزرت بش يطلق حملة من نوع

  " مهدي بن غربية … مرَّ من هنا يوم 14 جانفي " …

 بش يورينا قيمة رئيس القايمة متاعو

وعلى ما أعتقد مزال فما برشة ضحك و مفاجأت تنتظر فينا من عند سماحة السيد مهدي …

كيما مثلاً

« حفلة أم كلثوم فالقبة مهدي بن غربية حاضر …

  في الأرجنتين, كورة تميم عالبار  مهدي بن غربية زادة حاضر » 

(كيف المنوبي يرحم و ينعمو ) …

في الختام نحب نعبر على استغرابي الشديد ونحب زادة اندد بالحڨرة

 … وعلاش ميعطوليش أنا معه فالقايمة ؟؟؟

كان علىا من بنزرت … نهار 14 جانفي كنت موجود (عندي شهود و تصور زادة)

و كان على الأعوام لخرة عندي « CV » نضالي أصح منو …

صحيح ناقصني شوية حبس …

 أما حسب مانعلم مهوش شرط من شروط الترشح للمجلس التأسيسي ….

وفي إنتظار مهزلة ديمقراطية تقدمية جديدة

أيا سيدي السلام …