أيا سيدي السلام ...
اليوم بش نحكيلكم على بطاقة من بطاقات العهد البائد ...
إي نعم, بل هي بطاقة العهد البائد بإمتياز ...
البطاقة التي لم ترحل برحيل المخلوع
البطاقة إلي عذبت التوانسة وأبكت ملايين السياح من جميع أنحاء العالم ...
البطاقة إلي تسفه جرتها 70% من المسافرين في المطار
(معهد الفن للإحصاء) ...
وربرب في قلبه عون شرطة الحدود كلما نسيها أحد الركاب ...
انها البطاقة التي لأحد يعرف جدواها ... وزارة الداخلية ،أعوان المطار، الخطوط التونسية
وحتى من قام بتصميمها لا يعلم إلى حد الساعة فيما تستعمل هذه البطاقة الأعجوبة
نتصور برشة عرفتوني علاش نحكي ... أهيا الغنجة
- بطاقة ركوب أو نزول
! كيما قلتلكم زايد بش تعرف علاش وكيفاش ... خاطر مش بش تلقى إجابة مقنعة ...
أما أنا اليوم نحب نعرف حاجة أخرى
نحب نعرف وقتاش !؟
!!! وقتاش بش الناس إلي تخدم بالوراق هاذم يفهموا إلي احنا في 2011 ...
حتى الثورات أصبحت تدار بالحواسيب والشبكات الإجتماعية
وقتاش بش يفهموا إلي في العصر إلي طرشقت فيه التكنولوجيا الرقمية, الإعلامية
ووسائل الإتصال لا مكان فيه للاوراق إلا في بيوت الراحة ؟؟؟
وقتاش واحد يولي يمشي للمطار ماغير ما يطلع معاه ستيلو للطيارة ولا يقعد نص ساعة يلوج على واحد يتمزى عليه !؟
!!! وقتاش بش يفهموا إلي الورقة هذي قاعدة تتسبب في برشة حالات إنتفاخ في الأمعاء وفي الغدد اللمفاوية وتوصل في بعض الأحيان إلى مناطق حساسة من الجسد
ووقتاش بش يفهموا إلي حتى كان احنا التوانسة ستانسنا بالميزيرية الكلبة راهو التوريست إلي ساعات يتنقل من بلاد لبلاد ماغير مايستحق حتى باسبور
... مايفهمهش لحكايات هذي وحتى كان تفهمهالو ما تعجبوش
!!! هي برشة عباد خليقة تبدى خارجة ومذبيها ما ترجعش تزيدوا تكملوا على والديهم بالمرج هذا بخلاف التفتيف الزايد واللي لعندو لا ساس لا راس كيف التنبري ب-60 دينار
وإلي بالمناسبة أنا نعتبرو "بركاج" منظم في وضح النهار ... وسرقة عيني عينك
!!! يعجبكشي الواحد تقول عليه جواب مسوقر
!!! يعجبكشي الواحد تقول عليه جواب مسوقر
المهم أخوف ما أخاف إلي ورقة كيما هذي يكون عندها أهمية كبيرة في الحفاظ على
الأمن الداخلي والخارجي للبلاد ولا نطلعو نقاومو بيهم في الإرهاب أصلاً ...
وقتها بالحق ياخيبة المسعى
بون خسارة واحد مش مقدم روحو للتأسيسي باقي نحطها لحكاية هذي فالبرنامج متاعي
... والسلام
http://www.zaweli.tn : المصدر
بارك الله فيك على التدوينة :))) آني زادة عمري ما فهمت لاش تصلح و علاش مرة لونها أبيض و مرة أخضر ؟ و الغريبة قد ما عمرتها ديما ننساها و ترصيلي نتسلف في ستيلو في المطار
RépondreSupprimerإن شاء الله نتخلصو منها على قريب !
الورقة هذيكة موجودة في عديد البلدان...انا مشيت لأمريكا و طلبو مني نعمر ورقة كيفها
RépondreSupprimerLili :
RépondreSupprimerمرسي :)) ... ربي يخلص وحلنا وبرى
@Hidri :
موجودة في عديد البلدان ؟؟؟ بون يمكن عديد البلدن إلي إنت تحكي عليهم أنا لتو لا تعديتلهم وحتى لعباد إلي نعرفها تسافر لحد الأن ما مشاولهمش !!!
أول حاجة مش أمريكا تعمل فيها معناتها هذا ينجم يكون سبب بش احنا نعملوها ... و في أمريكا حتى الأمريكان يعمروها زادة الورقة ؟ ... شقولك في فرنسا سبانيا تركيا إيطاليا وغيرهم ... تنجم تجاوبني علاش ما يستعملوهاش ؟
تنجمش تقلي شنية المعلومة إلي موجودة فالورقة هذي مش موجودة فالباسبور ولا في ورقة الطيارة ؟ هي التسكرة تو معادش يستحقولها يا بو قلب وحنا مازلنا في بطاقات ركوب ونزول !؟