vendredi 29 octobre 2010

جولة في أخر الأخبار ... مروغات و دخول بقوة - الجزء 1



اليوم حبيت نعمل دورة و عكلة في أهمّ الأخبار ع الساحة ... بصراحة فمّا برشا جديد و أنا حرت على شنوة بش نحكي ...
الفنّ ,الأقتصاد و العلوم هوما أهمّ المواضيع في الفترة الأخيرة هاذي ... و لاحظت إلي عدد التدخلات الرشيقة ماشي و يكثر
و نشالا مزال الخير القدام ... شد عندك

الخبر الأول يخص قناة حنبعل إلي تخلّت على خدمات مقدم برنامج "شارع الحرية" الصحفي الفاظل سي سمير الوافي ...
"TUNIVISION" و كما جاء على صفحات موقع

"La raison serait que ce dernier n’a pas voulu changer de manière d’animer dans la nouvelle émission « Charaâ El Horréya ». Il a gardé le même style de « Assaraha Raha ». Par conséquent, sa façon provocatrice, souvent humiliante et dépourvue de fond pour certains observateurs, avait provoqué le refus même de certains invités importants à venir assister à l’émission."

غريبة هالحكاية و موش جادة عليّا خصوصا إلي سمير الوافي أو "راس البرشني" كما يحلو لميدو تسميته (أنا رغم كرهي للطفي العبدلي أما عجبني برشا في حكاية راس البرشني هاذي) معروف بالطريقة متاعو حتى من قبل مايدخل لتلفزا أصلا
... توّا يحبوه يتوب ? صعيب بصراحة شدت فيه الصنعا و فات الفوت ...
المهم نتصور إلي الموضوع خير شوية من هكاّ و الأيام القادمة تو تزيد توظحلنا الرؤية

النقطة الثانية إلي حبيت نحكي عليها اليوم هيا التدخل الرشيق (شوف هنا) متاع الأخت سوسن معالج كي حكات على أخر عمل ليها ... موش بش ناقش الموضوع إلي حكات عليه خاطر ماهوش من مشمولاتي أما فمّا جملة ما فهمتهاش كي قالت
" في تونس نعرفو الأبعاد إلي وراها هالبروبقندة ... أبعاد سياسية و إقتصادية أكثر منها روحنية و ما ورائية ..."
توّا الأبعاد السياسية إنجم نخدم مخي و نفهمها ... أما إقتصادية هاذي صعيبة شوية عليّا ... نتصورها حبّت تنبهنا من مخاطر أنتعاش سوق الفولارة و السبح و العطر أمام كساد أسواق البروتال و السون مونش و غيرو ... أي جميلة ... فكرة ماهيش دونية حتى طرف

ولا تحكي على مردودية و أنتاج معامل الخياطة و حبّت تنبه أصحاب المشاريع هاذي إلي بالقماش إلي بش يعملو بيه فولارة تتباع ب 20 دينار إنجمو نعملو زوز ولا تلاثة بوديات خفاف و سوم الواحد 25 دينار ... وهكا نظربو عصفورين بحجرة ,يزيد الربح و نجمو نخاقو مواطن شغل و نقظيو عالبطالة و كيما يقولو المغرفة الزايدة ما فيها فايدة

و الملاحظة الأخيرة ... توّا المرة إلي فاتت شباب تونس يبعث رسالة إلى شباب العالم يحكي معاه و يطيح فالقدر بمناسبة سنة الحوار مع الشباب ... و قلنا شبابنا صغير و موش واعي
!!! و اليوم المرأة التونسية توجه في برقيات حب و توعية على لسان سوسن معالج

??? ياخي ماناش ناوين نحشموا و نقصو من الرّويق البارد هذا
بربي هالدور الخيالي متاع الريادة موش ناوين نكملوه و نتلهاو بهمنا و المصايب إلي عنّا ... و يا أخي كيما يقول الكبتن خالد حسني كفانا ماللوغة و الريق متاع
"Heal The World"
... للحديث بقية

6 commentaires:

  1. ya3tik essaha EL FAN pour tous ces points évoqués

    RépondreSupprimer
  2. جولة هايلة تساعد الّي عنده برشة ماهو يتبّع في شيء

    شكرا الفنّ

    RépondreSupprimer
  3. بصراحة أنا كيفك عجبتني حكاية "راس البرشني" وبصراحة صراحة سي سمير يعرف وقتاش يستعملها غلي اطر خانته مع رؤوف بن يغلان و مع نانسي عجرم وقت الي قالتلو ما خصك اما مع فاطمة بوساحة ولى صيد وبصراحة قرار حنبعل مخر برشه وراس البرشني أصلا ما هوش تاع تلفزة

    RépondreSupprimer
  4. @Venus
    هوما إلي يعطيهم الصحة و العافية زادا ;)
    أنا خاطيني
    lloollooll

    @Wallada
    ننصحك بش تبع ديما جديد ... بصراحة الساحة حافلة برشا هالأيمات
    مرحبا بيك و شكرا على مرورك العطر
    :)

    @Fathi
    كان يطلع هذا هوّا السبب متاع تطريدة راس البرشني بصراحة يطلع سي نصرة عندو مدة موش قاعد يتفرج فالشان متاعو

    RépondreSupprimer
  5. ech 5ir min nachret el2a5bar hakka :D ... aya ikbes rou7ek we 7ell el idha3a (we zeda ndaber 5idma :P)

    RépondreSupprimer
  6. @Fléna:
    howa wa7ed 3amel blog w nchalla ysallakha !!!
    al Idha3at lil kibar fa9at ... moch liya ana ;)

    RépondreSupprimer