اليوم قريت مقال مهم كتبو المدون حسين وإلي تنجموا تقراوه هنا تحت عنوان :
L’impossibilité mathématique d’inscrire 7 millions de tunisiens sur les listes électorales, en 19 jours
المقال هايل ويفسر بطريقة حسابية إستحالة تسجيل أكثر من 7 ملاين تونسي في القوائم الانتخابية في مدة 19 يوم ...
بطبيعة الحال الحساب مش بش يكون صحيح 100% وهذا شي عادي لكن الشاي الأهم هو إلي يعطي فكرة واضحة على صعوبة المهمة أو استحالة تحقيقها
لكن فما نقطتين نحب نحكي عليهم واللي حسب رأي مهمين ومالزمناش ننساوهم واللي هوما :
قانونياً فما إمكانية انك تنتخب مغير ماتكون مقيد روحك -
الشرط الوحيد هو إلي تصوت في المكان إلي يتماشى مع عنوان إلي موجود في بطاقة اتعرف متاعك ... وهنا الناس إلي مش بش تخلط تقيد لسبب من الأسباب لازم تعرف إلي حقها ماضاعش ومازال عندها فرصة للتدارك نهار لنتخابات
الحاجة الثانية المهمة هيا إلي في صورة مززاتش المدة المحددة فما إمكانية إضافة أيمات اخرين -
بش لعباد إلي مخلطتش عالتقيد تدارك ، على شرط يكون إقبل التوانسة كثيف وهذي هيا أهم نقطة فالحكاية الكل ... معناتها بلوغة أخرى الكورة عند المواطن ولازم يكون هو فمستوى الحدث قبل كل شي
باختصار ، كل العمليات الحسابية إلي نجمو نعملوها اطيح فالماء لوكان المواطن متكونش عندو رغبة كبيرة بش ينتخب ... والكلام الكلو ماعاد عندو حتى معنى
وشخصياً هذي أكثر حاجة تخوفني ... تخوفني خاطر الإقبال لحد اليوم مهوش كبير على مكاتب التسجيل .... خاطر مانيش حاسس حماس كبير عالقليلة عند نسبة كبيرة من لعباد إلي نرى فيها ...
تخوفني خاطر قاعد نرى في برشة عباد معادش مهتمة بوضع البلاد كيما الأشهر الاولى متع الثورة ...
وخاطر فما ناس ضربها الإحباط ومش ناوية تشارك أصلاً
أهوكا علاش أنا نعتبر حضور 4 ولا 5 ملاين ناخب نهار 23 أكتوبر إنجاز كبير ورقم محترم برشة ...
لازم توعية كبيرة بأهمية الإستحقاق هذا ... وهذي حسب رأيي مهمة الاحزاب من شيرة ومهمة كل مواطن ناوي ينتخب و واعي بأهمية الانتخابات هذي على مستقبل لبلاد
أيا سيدي ... كل واحد يرجع يشد خدمتو و وين يعرضو حد يعرفوا مينساش بش يمرجلو الكبدة متاعو بش يمشي يقيد ...
وخاصةً بش يمشي نهار 23 أكتوبر كان حيانا ربي يرميلنة أكلوريقة فالصندوق والرب ملفوق يقسم لحقوق
وفي كلمتين ... أخي المواطن ... براس لحنينة بره قيد
:))
والسلام
انا و الله ما فهمتكش بالباهي ياخي انت مع الانتخابات او ضدها اشبيك تلف و تدور برشا و شاد العصا من الوسط تقولش عليك خايف من حاجة هاو انا باش انجيبهالك من الاخر دون خوف و طز في البريمة لن و لن ننخرط في هذه المهزلة هذه المؤامرة على البلاد و العباد فالانتخابات حق يراد به باطل حيث ان هذه العصابة التي ة للاسف الشدشيد متمسكة بنقاليد الحكم وهي لا تملك اي شرعية لذلك لا تريد الانتصار للثورة و تريد اجهاضها لانها بكل بساطة فاسدة الى حد النخاع وهي على يقين ان استمرارها مرتهن باستمرار الوجوه التجمعية في السلطة و المراكز الحساسة في البلاد تاكذ يا صديقي ان الشعب التونسي ليس ساذجا و لا بوهالي و لا هو سيدي تاتا من السذاجة بمكان ان يعتقد التونسي ان الانتخابات المزمع عقدها في 23 اكتوبر ستحقق له الانتقال الديموقراطي المنشود انما هي لا تعدو ان تكون فخ يمضي فيه التونسي وقوعه بما ان هذه الانتخابات انتصار حزبي على حساب مكتسبات الثورة هذه الاحزاب ذات البرامج الباهتة و الحادمة للغرب وهي لا تتجرا على الوقوف بوجهها ...........هذه الانتخابات ماخور .......و التونسي بلعها و تعدات عليه لانهم هيؤوه نفسنيا ليقبل بها بعد ان صوروها المنقذ الوحيد ...........تفضل يا تونسي و بين انك سيد نفسك
RépondreSupprimer@djolios:
RépondreSupprimerأهلا بيك ... :)
ما فهمتش وقتاش ريتني قلت إلي أنا ضد الإنتخابات ؟؟؟
صحيح معنديش ثقة كبيرة في ناس إلي تحكم إليوم في تونس لكن برشة توانسة عطاو بضهرهم لثورة ... وإلى حد اللحظة هذي مانيش قاعد نرى في طريق أخر !!!
إلي يعمل مظاهرة ولا إعتصام ياكل الضرب ولعباد تتشمت فيه ملفوق
شكراً عالزياره والتعليق
:))