ممكن أهم خبر واحد سمعوا الجمعة هذي هو خبر التحوير الوزاري إلي صار اليوم في الحكومة المؤقتة ...
أول حاجة خاطر واحد توحش يسمع خبر عالحكومة وثاني حاجة هي إلي من بين التحويرات إلي صارت فما تحوير حسب رأي مهم برشة
وهو تعين لازهر العكرمي كوزير معتمد لدى وزارة الداخلية مكلف بالاصلاح
كيما العادة الخبر عجب برشة عباد وفدد برشة اخرين ... فما شكون يعتبرو مناضل حقوقي وإنسان محل ثقة بش يقوم بمهمة كيما هذي وفما شكون مايعجبوش و فما حتى عباد تتعتبرو عميل صهيوني وما يتهزش بمقص النار ... وكلو يقعد حديث وماينفعش برشة خاصةً وقتلي جتنا الفرصة بش نحكمو على أفعال وحاجات ملموسة ... نخليو الكلام الكلو على جنب ونحاسبو الناس على الأداء
النقطة الإجابية فالحكاية حسب رأي هيا إلي وحسب مهمة الوزير في الظاهر تبدو إلي فما نية إصلاح "وزير معتمد لدى وزارة الداخلية مكلف بالاصلاح" ونتمنى متكونش حربوشة كالعادة ...
والفن كيف يشوف حاجة إيجابية شاهيتو تتحل ويولي يحلم ويتمنى و يفتح قلبو ليك يا سي لزهر ويحكيلك على امنياته
كمواطن تونسي بسيط يدفع في ضرائب ويخلص في فاتوراتو وما يرسكيش فالمترو (بالطبيعة خاطر ما نستعملوش ههههه)
... امنياتي واضحين وبساط برشة وهوما :
- تحاول مواصلة الحضور على وسائل الاعلام كيما عودتنا المدة إلي تعدات ... خاطر من أكبر مشاكلنا من نهارت إلي هرب زعبوع هيا مشكلة التواصل مع الناس وتوصيل المعلومة الصحيحة في وقتها
- تكون في مستوى التضحيات إلي قدموها الشهداء وإلي اغلبهم ماتوا على يدين أعوان تخدم فالوزارة إلي تعينت فيها ... وتساهم باللي تقدر عليه بش تجيبلهم حقهم
- ومدامك بش تتلهى بالإصلاح ... بربي أعمل طلة على الليستا هذي فيهم برشة تابعين الوزارة ...
الناس هاذم بلاصتهم داخل سجن المرناقية مش في وزارة الداخلية وأنا متأكد ونقصها يدي من هنا
( وأشار إلى كتفه فرحاً مسروراً ) إلي عددهم أكثر من هكا برشة ...
ونشالله في الأشهر القادمة تجينا على يديك الأخبار الباهية
وفقك الله إلى مافيه خير البلاد والعباد
والسلام
خليني نرجع نتبع الطالبي ونادية الفاني والظلاميين وين خلطو في لمان الشمل
جريدة الجرأة 30-06-2011
0 commentaires:
Enregistrer un commentaire