samedi 11 juin 2011

ارحمنا يا شيخ , عيب !!!



بصراحة شي يحشم بش واحد يحكي على الأستاذ محمد الطالبي أما الله غالب 
... غلب عليا هالأيمات
بطبيعة الحال مانيش بش نحكي وناقش في أمور دينية خاطر ماهيش من مشمولاتي وزيد لحقيقة متع ربي منجموش هو عالم وانا جرد مدون غير ربع 
 :))
لكن وعلى غير العادة بش نحاول نكنترولي روحي اليوم وما نطولش لساني تقديراً ليه و لعمرو علماً إلي سي محمد الطالبي من مواليد 1921 معناتها ميبعدش برشة  فالعمر على الإمام مالك يرحمو وينعمو



عاد بعد رحيل المخلوع بدات وسائل الاعلام تستدعى فيه وبشوية بشوية السيد ولا حاضر أكثر من قادة برشة احزاب، تي أكثر مالمرزوقي وبن جعفر يا رسول الله  !!! تونس 7 ، حنبعل ، شمس أف أم ...جرايد ، ندوة عند الحزب الديمقراطي التقدمي ...
....
هذا الكلو مش مهم برشة  ... ياخي أنا بش نحسدو ؟؟؟
و يقول القايل أكيد عندو بش ينفعنا ... 
: باهي على شنوة حكى ؟؟؟ أيا شد عندك

حد شرب الخمر عملو عمر إبن الخطاب -
 أي مزيانة المعلومة
علاش تقولو الأصحابة "رضي الله عنهم" شكون قللكم إلي هو سبحانو رضا ؟؟؟
 أي زيدنا يا شيخ
التيار السلفي "يقدس" السلف الصالح -
... هايلة هذي
! تنجم للة تشرب قد لي تحب خمر وبينك وبين ربي ، ربي قال أجتنوه برك -
 أه هذي توالمني برجولية
! أول من أدخل الفساد والعبث في بيت مال المسلمين  هو عثمان -
 ربي يسامحو و يغفرلو أش تحبني نقلك 
! الأسلام ليس دين قطر من الأقطار أو نوع من البشر -
!!! ههههه, تي هاك تبركالله عليك فيقلها بضبط بضبط 

وغيروا من المدخلات الرشيقة ...
 ورغم إلي فما برشة تبلبيز في كلامو لكن  كيما قلت مهوش وقتوا


أما أنا نحب نعرف ماهذا الكرنفال إلي حاللهولنا سيدي خويا ؟
يا أستاذ المواضيع هذي بش تقعدو تحكيو فيها إلى أن يرث الله الأرض ومن عليها 
زعمة شكون أولى نحكيو عليهم, الفساد في عهد الصحابة 
ولا المفسدة إلى قاعدة ترتع في  البلاد من نهارت إلي هرب سيدهم ؟
يمكن خاطر تحس في روحك أقربلهم في العمر

فقد ذهب معضم المؤرخين إلى أن الاستاذ محمد طالبي هو من الصحابة
 رضي الله عنهم وارضاهم فيما اعتبره من خالفهم أحد التابعين
والله أعلم 
:p


من 14 جانفي لليوم حكيتلناش على موضوع
 يعبر بالحق على مشاكل التونسي في المرحة هذي؟


يا أستاذ شوية إيجابية ... مش كان  تحكيلنا على التأخي وتكافل في الاسلام خير، أحكيلنا على الزكاة و الصدقة خلي الشعب يزيد يحن على بعضو،
 وينك في حكاية المتلوي ماجيتش بش تفكرنا إلي العروشية مش من دينا وكلنا توانسة وإلي
 "كل المسلم على المسلم حرام دمه وعرضه وماله" رواه البخاري ومسلم
 ولاّ
"وجلعناكم شعوباُ وقبائل لتعارفوا ان اكرمكم عند الله اتقاكم" (13) سورة الحجرات

ياخي كان المفكرين متاعنا مانعملوش عليهم في هالوضع الدقيق بش يلمو التوانسة الكل على شكون بش نعملو ؟؟؟


الاكيد إلي فما أطراف إعلامية وسياسية قاعدة تستغل فيك  وفي الأفكار متاعك  في حسابات ضيقة خاصةً إلي إنت معروف ماعندك حتى إنتماء حزبي
 لكن نتصور إلي مفكر في علمك إنت ميلزمش يطيح في فخ كيما هذا ويبعد في الوقت هذا بالذات على نقاشات جانبية ما توفاش
كانك على حركة النهضة كحزب ماهيش قاعدة تحكي على المواضيع هذي
 و التيار السلفي ماهوش مستعرف بالإنتخابات أصلاً
 و مزال عندكم الوقت بش تتعاركو فكريا إلى ما لا نهاية

في الأخير بالطبيعة
أنت حر في شنوة تحب تحكي و شنوة ماتحبش
 و أنا زدة حر في إلي يعجبني وإلي ما يعجنيش و ربي حبس علينا العقل و الدين

 أقول قولي هذا واستغفر الله لي ولكم من كل ذنب، فاستغفروه إنه هو الغفور الرحيم
 و السلام

6 commentaires:

  1. لكن وعلى غير العادة بش نحاول نكنترولي روحي اليوم وما نطولش لساني ...

    محاولة فاشلة :p

    RépondreSupprimer
  2. بالحق ؟؟؟ :(
    نجم نكون أعقل من هكا ؟ بصراحة عملت مجهودي
    ونحيت برشة عفسات هههع ههع ههع
    :D

    RépondreSupprimer
  3. looool aya bellotf walla rak 3fast fih errajel gued gued

    RépondreSupprimer
  4. والله من إحترم عقولنا احترمناه وكان على هذا الرجل المسن أن يحترم حالة الوهن العقلي الذي صار إليه بحكم سنه وأن لا يترك نفسه لقمة بين يدي الحمقى ليرصفوا من علمه السابق مطيه للمساس بالعقيده وهو على كل حال حسب رأيي ولا ألزمك يا الفان بشيء دليل على عجز الإنسان حين قال عنه رب العالمين " ومن نعمّره ننكّسه في الأرض حتى لا يعلم بعد علم شيئا .." أمّا الرضا عن السلف الصالح فحسبهم تبشير رسول الله صلى الله عليه وسلم لهم بدخول جنّة الرضوان ولم تكن الجنة بصريح الآية إلا لمن رضي الله عنهم ولعل الرجل نسى وقد طال به العمر أن النبي أقام حد الجلد على رجل لم يترك الخمر وقد نهى بعض صحبه حينما لعنوا الرجل لكثرة وقوعه في المعصيه ودعاهم لتدبّر حضور الرجل طوعا ليقام عليه الحد .كما أنه قد نسى أن الأمر باجتناب رجس الشيطان المتمثل في شرب الخمر قطعي وليس أقل من أنه سبحانه أقر أن الخمر رجس من عمل الشيطان ولم نعلم للشيطان أعمال تحمل على الجواز العيب كل العيب أن يتعرض لرجل عابد تستحيي منه الملائكه ولهذا أسأل الله حسن الخاتمه واليقين به أيام الشبيبه حتى لا ينتهي الإيمان إلى الغلط أيام الضعف والشيبه

    RépondreSupprimer
  5. @guyguoz :
    واحد كان بش يحكي على التبلبيز متاعو يقعد جمعة يحكي و مايكملش مع العلم إلي تونس فيها ناس تقريه و تذكرو كانو ناسي بش يراجع درسو ... و المصيبة يستعملو فيه برشة أطراف في أغراض سياسية كيما التقدمي و هو يتبع
    الكبر يعمل...
    :))

    RépondreSupprimer
  6. @guyguoz : le verset illi ta7ki 3lih ghalet , il ne faut pas jouer avec ca
    وَمَن نُّعَمِّرْهُ نُنَكِّسْهُ فِي الخَلْقِ أَفَلاَ يَعْقِلُونَ
    souret yessine

    et ..

    وَاللَّهُ خَلَقَكُمْ ثُمَّ يَتَوَفَّاكُمْ وَمِنكُم مَّن يُرَدُّ إِلَى أَرْذَلِ العُمُرِ لِكَيْ لاَ يَعْلَمَ بَعْدَ عِلْمٍ شَيْئاً إِنَّ اللَّهَ عَلِيمٌ قَدِيرٌ

    souret na7l

    RépondreSupprimer