النساء إلي مش ديمقراطيات حتى طرف

Partager

اليوم بش نحكي بسرعة على مقال ريتو على موقع وكالة تونس إفريقيا للأنباء

 واللي تنجموا تقراوه لهنا

المقال كالعادة فيه برشة تجارة بالمرأة وبحقوق المرأة والشاي هذا مش غريب لكن ستانسنة بيه عنا سنين مع العلم إلي في تونس معناش تجارة بسم الدين برك ، عنا تجارة بسم الحادثة وبسم المرأة وحتى بسم حرية التعبير ... المهم أي حاجة نصور منها خير ربي ... والحمد للله على كل حال

لكن الحاجة الغريبة شوية هيا الجملة إلي جات في أخر المقال واللي تقول :

"لا مجال لان تكون الشريعة مصدرا للتشريع"

هايل برشة وهنا وبهذه المناسبة السعيدة نحب نسئل فالمقام الأول الجمعية

هذي  زوز اسئلة :

السؤال الأول وهو سؤال كلاسيكي تطرح برشة مرات ...

من أنتم ؟؟؟

السؤال الثاني وهو الأهم ... في صورة يقع إستفتاء الشعب التونسي في إمكانية إعتمد الشريعة الاسلامية كمصدر من مصادر التشريع وكانت إجابة  الأغلبية الساحقة بي "نعم" شنوة تعملو ؟؟؟

الاقتراح رقم 1  : ترجعو بن علي

الاقتراح رقم 2 : نقولو للجيش يشد الحكم

الاقتراح رقم 3 : بش يشدكم الحرس فالمياه الاقليمية حارقين في بطو ،تغنيو وتشطحو على غناية البابور يا من أمور كيما شطحتو وغنيتو على أغنية محلا القاعدة عالمية ومحلا الربيع ؟؟؟

فالختام نحب نذكر الجمعيات هذي بتلاثة حاجات  مهمة برشة ونشالله تنفعهم في نضالاتهم المستقبلية :

التذكير رقم 1 : معنى كلمة ديمقراطية

التذكير رقم 2 : ما فما حتى شخص والا جمعية ولا هيئة عندها شرعية بعد الثورة ...  إنطلاقاً من الأخ قايد الثورة فؤاد لمبزع مروراً بالاخ قايد السبسي وصولاً لهيئة عياض بن عاشور وبقية الأحزاب والجمعيات ، الشرعية الوحيدة هيا لشعب وإلي صاير الكل مبني على توافق هش نعكزو بيه وينجم يطيح فالماء في أي لحظة

التذكير رقم 3 : المكان الوحيد إلي في الفترة هذي تنجم تفرض فيه جمعيتكم مبادئها  واختياراتها  هيا المقرات إلي تنشطو فيهم وتحت تصرفكم فقط !!!

 تنجمو حتى تقومو فيهم الأذن :))

 

ويرحم والديكم يزينا من الوصاية على الشعب ... راهو حتى كان الشعب يقرر بش يعمل إنتحار جماعي هذا من حقو :))

ملاحظة : في صورة إلي السيد إلي كتب المقال تبلى عليكم وانتوما ماقلتوش الشي هذا أنا نسحب كلامي الكل ... وبراس إلي يعز عليكم مرمدوه وحطوه في إطارو ولكم الأجر إنشاء الله

أيا السلام