dimanche 16 janvier 2011

... تونس حرة : حلم يتحقق


? شكون كان يتصور إلي في ليلة ونهار الحلم يولي حقيقة
? شكون كان يتصور إلي سنة 2011 بش تجيب معاها التحولات هاذي الكل 

أنا بصراحة نستعرف إلي في وقت مالأوقات ظربني نوع مالأحباط و ماليأس
لكن شعبنا العزيز تحرك و قال كلمتو و فرض واقع جديد في وجه واحد من أكبر طغات القرن 21

حلم كبير و كل يوم يزيد يكبر فينا ... 
حلم بالعدالة والحرية ... حلم برفع الظلم و القهر ... 
القهر إلي حسّ بيه محمد الوعزيزي و إلي أنطلقت منّو شرارة ثورة الأحرار ...
 ثورة أنطلقت بشعرات أجتماعية كيما

 "التشغيل أستحقاق يا عصابة السراق"
" و " شغل حرية كرامة وطنية 

وصولا لمطالب سياسية و تحررية واظحة كيما

 "يسقط حزب الدستور ... يسقط جلاد الشعب"
" و "خبز وماء ... و بن علي لا
وفي رواية أخرى
 "خبز وماء ... و الحجامة لا"
:p

 ... ليسجل التاريخ يوم 14/01/2011 يوم نصر لهذا الشعب المناضل

المهم و الشي إلي نحب نأكد عليه اليوم هوا إلي الأنجاز هذا ماهوش ملك خاص لأي حد الأنجاز هذا هوا ملك الشعب التونسي الكل ... 
لا للأقصاء ولا للتهميش ... تونس لتوانسة الكل ... 
بجميع التيارات و الإتجهات الفكرية و السياسية هذا هوا الحل للخروج من عهد الأستبداد و السير نحو مستقبل افضل
 و لتكون صناديق الأقتراع هيا الفيصل كيما قال زعبوع
:D

من الواظح إلي الأولوية هيا أسترجاع الأمن و القضاء على عصابات الخراب و مبعد نواصلو الطريق متاعنا بش نظفو هياكل الدولة من بقايا الدكتاتورية

اليوم الشعب هذا أثبت للعالم الكل إلي هوا شعب متحظر و مسؤل قادر على بناء دولة القانون و الحريات ... ويلزم نكملو في نفس الطريق ... صحيح الطريق طويل لكن عندي ثقة كبيرة في عزيمة هذا الشعب 

لن نخونك يا بوعزيزي ... لن نخون شهدائنا الأحرار
... الحرية لشعب تونس ... و المجد للشهداء


6 commentaires:

  1. تعرف يا فنّان نحكي مع صحيب نهارة ماتش النجم والترجي قلّى شقولك قلتلو ربّي يستر دم الشهداء . العاصمه أمورها مهياش ، خصوصي وأنو قرابة 26 يوم تعدّاو على بداية الإنتفاضه في سيدي بوزيد وتاله ورقاب بالقصرين والعاصمه قعدت بارده كيف النقابيين دعموا الشارع وخرجوا ثلاثين ألف في صفاقس عرفت إلّي الحريه ممكنه وبالنسبه ليّ النقابات رجعت الحريه لتونس إلّي قلتو يا فنّان الكل صحيح و الصبر باهي توّه ولنحتفل بالعيش من جديد بكرامه

    RépondreSupprimer
  2. nous en avions même pas rêvé .; mais nous l'avons fait !

    RépondreSupprimer
  3. @guyguoz & @maxual :
    المهم إلي الكلنا نتعاونو بش يكون المستقبل أفضل
    :))

    RépondreSupprimer
  4. أمين ... شكرا عالزيارة العزيزة :)

    RépondreSupprimer
  5. http://veritun.kif.fr/-a2604599 ;)

    RépondreSupprimer