الجنس ,الفلوس والإجرام ... هاذي حاجات ولات موجودة بكثرة في مسلسلاتنا السنين لخرة ... الشي إلي ماعجبش برشا عباد في الشارع التونسي من ناحية و قالو شهر فظيل و "ماناش متاع الشي هذا" و عجب عباد أخرين من ناحية أخرى و قالو باهي الواحد كي يرى عيوبو و أحنا هكا ...
هوا كي تجي تشوف من ناحية "أحنا هكا", صحيح أحنا عنا برشا حاجات كيما المسلسلات متاعنا و نزيد نمشي لبعد و نقول إلي أحنا عنا حاجات أكثر مل المسلسلات و أتعس ملي نراو فيه و في جميع الميادين و كيما عنا حاجات باهيا زادا
? أما ويني
? علاش ما يحكي عليها حد
? زعما إلي نراو فيه في مسلسلاتنا هيا أهم القضايا متاع المواطن التونسي
? زعمة مانجموش نحكيو على حاجات أخرى
??? ولا على خطرالمواضيع الأخري ما توكلش الخبز
??? يا أخي علاش النقد متاعنا موش منجم يطاع فوق النص اللوطاني
أما كان تجي تشوف من ناحية " ماناش متاع الشي هذا ", صحيح شهر فظيل تتلم فيه العايلة و مانا إلا مسلمين ... أما بالله رجاء مالعباد إلي تحكي هكا مايتفرجوش فالمسلسلات هاذي
على خاطر عيب برشا واحد يحكي و عاطي ما عندو و ينقد و مش عاجبو و في ليل تلقاه مبنك يتفرج مدور بيه عايلتو تاي و كاكوية و ما هوش هنا
نرجعو إلي مثال مسلسل "المكتوب" و إلي رغم الحديث
!!! و رغم النقد تفرجو فيه 8/10 مالتوانسة
كان الناس إلي متقلقة كلها ما كملتش تفرجت فيه راهو ما جابش نسبة كبيرة كيما هاذي و راهو المنتج ممكن كان يحترمهم أكثر و ياخو رايهم بعين الأعتبار في المسلسل الجاي
و أنا نتصور فالوقت الحالي قناتنا الوطنية و إلي نسبة كبيرة مالمدخول متاعها يوفرهولها المواطن التونسي مش بش تبدل السياسة متاعها ... على خاطر السنوات الفارطة السياسة هاذي أثبتت نجاحها و كانت رابحة وعطات مرابيح كبيرة ... و المنتجين متاع المسلسلات هاذي كيف كيف ماهيش بش تبدل ... مادمنا أحنا ما تبدلناش
الشي إلي قاعد يصير ماعندو حتى علاقت بالفن و هوا نتيجة إلي المناخ العام إلي قاعدين
...نعيشو فيه ... أحنا في وقت إلي الفلوس هيا إلي تحدد الأختيارات متاع العمل مهما كان
وقت يولي مجال الإبداع ظيق, وقت إلي القيم ماعاد عندها حتى قيمة و وقت إلي ربح المال هوا الهدف الوحيد حتى على حساب القيم و الأخلاق ... ما نتصورش إلي النتيجة تنجم تكون خير من هكا
0 commentaires:
Enregistrer un commentaire