أيا سيدي السلام ...
أسفي عميق ... عميق جداً ... عميق جداً "... قالها زعبوع يوم 13 جانفي "
وأجهش طحانة الغلبة بالبكاء ...
أما اليوم الفن اسفو عميق جداً زادة أكثر من أسف زعبوع على كرسيه ...
حزن كبير نحس فيه وأنا كل يوم تقرب الإنتخابات
كل يوم يتلاشى الأمل بش نجم نمشي نعطي صوتي ونشارك
هو ماهوش إختيار لكن لأسباب مهنية قاهرة سيدي الرئيس ...
نزيد نتأسف كي نتفكر إلي أنا فالعمر هذا شعري شاب وزروسي بدات تطيح
(مش من الكبر أما مالغزازل ههههه)
وعمري ما شاركت في إنتخابات ...
أنا برجولية كنت معمل نشارك المرة هذي ونحلف عليها ... لكن منظرها مش كاتبة
أني واي ...
في صورة إلي ماخلطش بش نساهم مع الشعب التونسي الكريم
في كنس بقية النظام "البايت" وغيرهم من الحشرات إلي قاعدة تسمم
في أجواء هذا البلد العزيز ...
وفي صورة فما ولاد حلال ناوين ينتخبو في بلاصتي ... عندي رجاء وحيد
!!! بربي أخترولي إلي تحبوا أما حزب نجيب الله الشابي والقطب لا
برحمة إلي يعز عليكم لا ... أمان, ماني خوكم
ياخويا كان ضاقت عليكم أهوكة شكري الواعر ...
عالقليلة ولد جمعية وزيد ماركة متع تضيع وقت ...
المجلس بش يكمل الدستور وهو تلقاه مازال يسكر فالصبات متاعو
تقول بش يعمل سنتراج
وماغير ما نطول عليكم سيدي ... نخليكم في أمان الله وماتنسوش
نهار 23 أكتوبر الواجب يناديكم ... كلنا على فرد كلمة
"لن تمروا ... وكان تعديتو !؟ سنرمي والديكم بالحجارة"
والسلام
Bonus Track : دنيا بخوت فوزي بن قمره
